ბუხუტი დარახველიძე

დაბადების ადგილი: სოფელი ლეხიდრისთავი, ქუთაისის რაიონი.

დაამთავრა საქართველოს ფიზკულტურის ინსტიტუტი 1940 წელს.

1937 წლიდან ცეკვა დაიწყო თბილისის სახელმწიფო უნივერსიტეტის თვითმოქმედ ქორეოგრაფიულ ანსამბლში. 1937-1941 წლამდე საქართველოს სიმღერისა და ცეკვის სახელმწიფო ანსამბლში ცეკვავდა, პარალელურად თბილისის ოპერისა და ბალეტის თეატრში სოლისტ-მოცეკვავეა. 1941 წელს საბჭოთა არმიის რიგებში გაიწვიეს, სადაც მეავტომატეთა ასეულს მეთაურობდა. 1946-1949 წლებში დარახველიძემ მუშაობა დაიწყო თბილისის ვაჭრობის მუშაკთა კულტურის სახლში. 1956-1957 წლებში იყო ლენინური კომკავშირის სახ. თბილისის ცენტრალური კულტურის სახლის მოცეკვავეთა ანსამბლის სამხატვრო ხელმძღვანელი. 1957-1958 წლებში საქართველოს პროფსაბჭოსთან არსებული სიმღერისა და ცეკვის ანსამბლის მთავარი ქორეოგრაფი. 1959-1961 წლებში ხელმძღვანელობდა ა/კ რკონიგზის სახლთან არსებულ მოცეკვავეთა ანსამბლს, პარალელურად მუშაობდა ქორეოგრაფად თბილისის ბ. ძნელაძის სახ. პიონერთა და მოსწავლეთა რესპუბლიკურ სასახლეში. 1961-1965 წლებში მიიწვიეს საქართველოს პოლიტექნიკური ინსტიტუტის სტუდენტთა ქორეოგრაფიული ანსამბლის, თბილისის ტრამვაი-ტროლეიბუსების სამმართველოსა და გორკის სახ. კულტურის სახლის ქორეოგრაფიული კოლექტივების ხელმძღვანელად. 1965-1969 წლებში მუშაობდა რუსთავის ახლად შექმნილ მოცეკვავეთა ანსამბლ "სალხინოში" სამხატვრო ხელმძღვანელად და ცეკვების დამდგმელად. 1968–1970 წლებში ხელმძღვანელობდა თელავისა და ახმეტის ხალხური ცეკვების ანსამბლებს. 1970 წელს ჩამოაყალიბა ქუთაისის ხალხური ცეკვის თვითმოქმედი ანსამბლი "ქუთაისი", რომელსაც სათავეში ედგა 1975 წლამდე. ამავე პერიოდში ხელმძღვანელობდა ქუთაისის ქორეოგრაფიულ სტუდიას ქუთაისის კულტსაგანმანათლებლო სასწავლებელში. 1976 წელს დაინიშნა საქართველოს ხალხური სიმღერისა და ცეკვის სახელმწიფო დამსახურებული ანსამბლის მთავარი ქორეოგრაფის თანამდებობაზე. იგი იყო მსოფლიო ახალგაზრდობისა და სტუდენტთა VI, VII, VIII, IX და X ფესტივალების მონაწილე, არის ამ ფესტივალების ოთხი ოქრისა და ერთი ვერცხლის მედლის, აგრეთვე ხუთივე ფესტივალის ლაურეატის საპატიო წოდების მფლობელი. მისი დადგმული ცეკვებიდან აღსანიშნავია: "სალხინო", "ფარიკაობა", "ზემოხეური", "ახალგაზრდული", "აწკიპულა", "ალალმე", "გოგმანი", "შურდულა", "სადარბაზო", "ძველი თბილისი", ასევე ცეკვებს დგამდა დრამატულ თეატრებში: ო. თაქთაქიშვილის ოპერა "მთვარის მოტაცებაში" (სსრკ სახელმწიფო აკადემიური დიდი თეატრის სცენაზე, 1977), კინოფილმებში და საოპერო წარმოდგენებში. არის ახალგაზრდობისა და სტუდენტთა VI  (მოსკოვი, 1957), VII (ვენა, 1959), VIII (ჰელსინკი, 1962), X (ბერლინი, 1973) მსოფლიო ფესტივალების ლაურეატი; დაჯილდოებულია საქართველოს უმაღლესი საბჭოს პრეზიდიუმის საპატიო სიგელებით.

წყარო: ქართული ხალხური ქორეოგრაფიის მოღვაწენი / გიორგი სუხიშვილი.-თბ.,1988.-გვ.58

• 1962 - საქართველოს სახალხო არტისტი
• 1957 - საქართველოს ხელოვნების დამსახურებული მოღვაწე