ავგაროზ ბანდაისძე

ავგაროზ ბანდაისძე იყო XIV საუკუნის ქართველი მწიგნობარი, კალიგრაფი და მხატვარი. მოღვაწეობდა ქსნის ერისთავების კარზე. გადაუწერია ლარგვისის მონასტრიდან ჩამოტანილი პარაკლიტონი–კრებული, რომელიც შეიცავს კვირის ყოველი დღისათვის განკუთვნილ საეკლესიო საგალობლებს. ნაწერი ნუსხურია, გადაწერილია ლამაზად, გამოცდილი და დამაჯერებელი ხელით, ყავისფერი მელნით, ერთ სვეტად ტექსტშივე  ჩართული  სინგურით გამოყვანილი მთავრული ასოებით. მასვე შეუსრულებია კამარები და მახარებელთა სურათები ქსნის ერისთავის ვირშელისათვის გიორგი თაბაურის მიერ გადაწერილ სახარებაში. ავგაროზ ბანდაისძის შედგენილი უნდა იყოს ქსნის საერისთაოს ცნობილი მატიანე "ძეგლი ერისთავთა". შოთა მესხიას მოსაზრებით, მარი ბროსეს არქივში აღმოჩენილი ორიგინალი ავგაროზ ბანდაისძის დაწერილია, მისივე შესრულებულია ვირშელ III–ის პორტრეტი ამ ხელნაწერში. ბანდას(ბანდაის ძეთა) გვარი ეტყობა ქსნის საერისთაოში კულტურის მოღვაწეთა დინასტიას წარმოადგენდა. 

წყარო: საქართველო: ენციკლოპედია: ტ.I.–თბ., 1997.–გვ.62