ოთარ აბდალაძე

დაამთავრა თბილისის სახელმწიფო უნივერსიტეტის ბიოლოგიის ფაკულტეტი 1981 წელს; ლენინგრადის (ამჟამად სანქტ-პეტერბურგის) სსრკ მეცნიერებათა აკადემიის კომაროვის სახელობის ბოტანიკის ინსტიტუტის ასპირანტურა 1984 წელს.

1988-1990წწ. მაღალმთის მცენარეთა ეკოლოგიის დარგში გაიარა სტაჟირება ინსბრუკის უნივერსიტეტის ბოტანიკის ინსტიტუტში; 1984-2011წწ. ნ. კეცხოველის თბილისის ბოტანიკის ინსტიტუტი; 2002–2011წწ. ამავე ინსტიტუტის "მაღალმთის მცენარეულობის ეკოლოგიის" განყოფილების გამგე; 2005–2006წწ. დირექტორის მოადგილე სამეცნიერო დარგში; 2006 წლიდან ილიას სახელმწიფო უნივერსიტეტი; 2009 წლიდან ამავე უნივერსიტეტის ეკოლოგიის ინსტიტუტის თანადირექტორი და "მაღალმთის ეკოსისტემების კვლევის პროგრამის" ხელმძღვანელია; 2011 წლიდან ეკოლოგიის პროფესორი. გამოქვეყნებული აქვს 58 სამეცნიერო პუბლიკაცია. სამეცნიერო ინტერესის სფეროა: მცენარეთა ფუნქციური ეკოლოგია (CO2-გაზთა ცვლა, ტემპერატურისა და სინათლის რეჟიმები, წყლის ბალანსი), მაღალმთის მცენარეულ თანასაზოგადოებათა სტრუქტურულ-ფუნქციური ორგანიზაცია, მცენარეთა ადაპტაციური სტრატეგიები სტრეს-დომინანტურ გარემოში, კლიმატის გლობალური ცვლილების ეკოლოგიური პერსპექტივები, მაღალმთის მცენარეულობა როგორც გლობალური ცვლილებების ბიოინდიკატორი, მცენარეთაშორისი ურთიერთობები ეკოლოგიურ გრადიენტზე, მცენარეთა და მცენარეულ თანასაზოგადოებათა მრავალფეროვნება, ეკოლოგიური განათლების საკითხები და ა.შ. 

საკანდიდატო დისერტაციის თემა - "ცენტრალური კავკასიონის სუბალპური სარტყლის მცენარეთა CO2-გაზთა ცვლა", დაიცვა 1985 წელს.

სადოქტორო დისერტაციის თემა - "საქართველოს მაღალმთის მცენარეთა CO2-გაზთა ცვლა", დაიცვა 1994 წელს.

წყარო: tsu.ge; ილიას სახელმწიფო უნივერსიტეტი: faculty.iliauni.edu.ge

• GLORIA-ს (Global Observation Research Initiative in Alpine Environments) კონსორციუმი, წევრი (2001-)
• GMBA-ს (Global Mountain Biodiversity Assessment), წევრი (2005-)
• საერთაშორისო სამეცნიერო ჟურნალი "Applied Ecology and Environmental Research", რედკოლეგიის წევრი (2014-)