კონსტანტინე ამირაჯიბი

დაბადების ადგილი: ქ. თბილისი.

დაამთავრა ოდესის უნივერსიტეტი 1893 წელს.

მუშაობა დაიწყო ოდესის უნივერსიტეტის ქიმიური ტექნოლოგიის კათედრის ასისტენტად პროფესორ კ. პეტრიაშვილთან, რომლის შეხედულებები საფუძვლად დაედო მის შემდგომ საქმიანობას. 1874 წელს მიავლინეს საზღვარგარეთ(საფრანგეთსა და გერმანიაში). 1897 წელს დაბრუნდა საქართველოში, მშობლიურ სოფელ ავლევში, სადაც  1918 წლამდე ცხოვრობდა. ავლევში შექმნა მოწინავე, იმდროინდელი ევროპული დონის მეურნეობა. ეწეოდა ფართო სელექციურ მუშაობას. მდინარე ფრონეზე ააშენა მცირე ჰესი. 1907 წელს დააარსა ქართულენოვანი სასოფლო-სამეურნეო სკოლა, სააქციო საზოგადოება და მეპაიეთა ბანკი. იგი პრაქტიკულად ახორციელებდა თერგდალეულთა, კერძოდ კი ილია ჭავჭავაძის შეხედულებებს ქართული სოფლის მოწყობის შესახებ. 1919 წელს კონსტანტინე ამირაჯიბი მიიწვიეს თბილისის სახელმწიფო უნივერსიტეტში დოცენტის თანამდებობაზე და სასოფლო-სამეურნეო მანქანათმცოდნეობის კათედრის გამგედ. 1927 წელს ამირაჯიბის ინიციატივით ჩამოყალიბდა სასოფლო-სამეურნეო მანქანა-იარაღების საცდელი სადგური, რომელსაც შემდგომში მისი სახელი მიენიჭა. 1931 წელს ამ სადგურის ბაზაზე შეიქმნა სოფლის მეურნეობის მექანიზაციის კვლევითი ინსტიტუტი, რომლის დირექტორიც 1934 წლამდე ამირაჯიბი იყო (შემდგომში ამ ინსტიტუტს კონსტანტინე ამირაჯიბის სახელი მიენიჭა). პროფესორ ა. დიდებულიძესთან ერთად შექმნა და გამოცადა ელექტროტრაქტორი. 1920 წელს გამოიცა ამირაჯიბის სასოფლო-სამეურნეო მექანიკის ლექციების კურსი. მეცნიერი სოფლის მეურნეობის მექანიზაციის დარგში. პროფესორი (1927), საზოგადო მოღვაწე.

წყარო: საქართველო: ენციკლოპედია: ტ.I.–თბ., 1997.–გვ.133; საქართველოს დემოკრატიული რესპუბლიკა (1918-1921): ენციკლოპედია -ლექსიკონი. -თბ., 2018.-გვ. 26

• 1934 - საქართველოს მეცნიერებისა და ტექნიკის დამსახურებული მოღვაწე
• შრომის წითელი დროშის ორდენი
• ლენინის ორდენი

• მიწათმოქმედების მექანიკა : მოკლე კონსპექტი (ავტორი). - თბილისი, სას.-სამ. ინსტ-ის სტ.) , 1936. - 56გვ.
• ტრაქტორ "ჰოლტ 2 ტ" და "ინტერნაციონალი 30-15" : (გამოცდების შედეგები) (ავტორი). - ტფილისი, 1928. - 28გვ.
• გუთნები: "Дт2", "Дт3", "Дт4" "წითელი აქსაი"-ს ქარხნისა ნახიჩევანში და "ДтЛЗ-м" "ოქტომბრის რევოლიუციის სახელობის" ქარხნისა ოდესაში : (გამოცდების შედეგები) (ავტორი). - ტფილისი, 1928. - 19გვ.