სოფიო ამირაჯიბი

დაბადების ადგილი: ქ. თბილისი.

პირველდაწყებითი განათლება შინ მიიღო. შემდეგ ფაბრის პანსიონში მიაბარეს. დამოუკიდებლად შეისწავლა რუსული და ფრანგული ენები.

იყო გენერალ მიხეილ ქაიხოსროს ძე ამირაჯიბის მეუღლე. სოფიო ამირაჯიბმა რუსულად თარგმნა ქართველი პოეტების ნ. ბარათაშვილის, გრიგოლ, ვახტანგ და ნინო ორბელიანების, მ. თუმანიშვილის, ი. ჭავჭავაძის, რ. ერისთავის, მ. გურიელის, ა. წერეთლის, გ. აბაშიძის, ვაჟა–ფშაველას, შ. არაგვისპირელის, ი. ევდოშვილის, განდეგილის, ია ეკალაძის, ე. მიქელაძის და ლ. ციციშვილის ნაწარმოებები. ეს თარგმანები იბეჭდებოდა "კავკაზსკი ვესტნიკში", "არგონავტში", "ნოვოე ობოზრენიეში", "ტიფლისსკი ლისტოკში" და სხვ. 1909 წელს მოსკოვში დაიბეჭდა  "ქართველი პოეტების ლექსების კრებული" ა. ხახანაშვილის მცირე წინასიტყვაობით, რომელშიც შეტანილია ჩამოთვლილ პოეტთა ნაწარმოებების მისეული თარგმანები სურათებითა და ბიოგრაფიულ–ბიბლიოგრაფიული ცნობებით. ქველმოქმედი.

წყარო: საქართველო: ენციკლოპედია: ტ.I.–თბ., 1997.–გვ.133