ანზორ კავსაძე

დაბადების ადგილი: ქ. ჭიათურა.

დაამთავრა ვანო სარაჯიშვილის სახელობის თბილისის სახელმწიფო კონსერვატორია 1956 წელს (საგუნდო–სადირიჟორო).

დაიბადა მომღერლების ოჯახში – მამამისი ტენორი, იყო, დედა - სოპრანო; ბავშვს თავიდანვე კარგი მუსიკალური სმენა და ხმა (დისკანტი) ჰქონდა; ცხრა წლისა იყო, როცა ჭიათურის მუსიკალურ სკოლაში ფორტეპიანოზე დაკვრა დააწყებინეს; ცნობილი სანდრო კავსაძის შვილიშვილი ბავშვობაშივე ახერხებდა ჭიათურაში პატარა პიონერული გუნდების ხელმძღვანელობას; 19 წლისა თბილისის პოლიტექნიკურ ინსტიტუტში იწყებს სწავლას, მაგრამ, მუსიკას მოწყურებული, პარალელურად თბილისის II მუსიკალურ სასწავლებელში საგუნდო ხელოვნებას ეუფლება გრიგოლ კაპანაძესთან, რომელიც შთააგონებს მას მომავალ პროფესიას - დირიჟორობას, შემდეგ იგი ნიჭიერ ბავშვთა მუსიკალურ სკოლა-ინტერნატში შედის, იქიდან კი უკვე 1951 წელს თბილისის კონსერვატორიაში აბარებს; 1949 წელს თავისი ბიძის, მიხეილ კავსაძის, გუნდში სიმღერამ მას ბევრი რამ შესძინა; მის მიერ ჭიათურაში მომზადებულმა გუნდმა 1951 წლის ოლიმპიადაზე პირველი ადგილი დაიკავა; სწავლის პარალელურად ეწეოდა სადირიჟორო მოღვაწეობას; 1951 წლიდან იყო საქართველოს რადიოს კაპელის დირიჟორი და მომღერალი; 1954–1958წწ. ვ. სარაჯიშვილის სახელობის თბილისის სახელმწიფო კონსერვატორიის საოპერო სტუდიის გუნდის დირიჟორი; 1956–1957წწ. საქართველოს სახელმწიფო ფილარმონიის კაპელის დირიჟორი; 1957–1966წწ. საქართველოს ხალხური სიმღერისა და ცეკვის სახელმწიფო დამსახურებული ანსამბლის მთავარი დირიჟორი, 1968–1975წწ. ამავე ანსამბლის სამხატვრო ხელმძღვანელი და მთავარი დირიჟორი; ამ წლებში ანსამბლმა განსაკუთრებით მაღალმხატვრულ საშემსრულებლო დონეს მიაღწია, ქართული ხელოვნების მეორე დეკადაზე მოსკოვში თავი ისახელა კარგი რეპერტუარითა და დახვეწილი შესრულებით, წარმატებით გამართა გასტროლები საზღვარგარეთ, მათ შორის ამერიკის შეერთებულ შტატებში; ხელმძღვანელობდა სხვადასხვა თვითმოქმედ ანსამბლებს, კვარტეტებს, ოქტეტებს და გარდა ამისა, სახელმწიფო კონსერვატორიაში საოპერო მომზადების კათედრაზე მუშაობდა პედაგოგ-დირიჟორად.

წყარო: მუსიკის ენციკლოპედიური ლექსიკონი. – თბ., 2007. – გვ. 124

• საქართველოს სახალხო არტისტი