ლიანა კალმახელიძე

დაბადების ადგილი: ქ. თელავი.

დაამთავრა ვანო სარაჯიშვილის სახელობის თბილისის სახელმწიფო კონსერვატორია 1973 წელს.

17 წლის ასაკში, მან თავისი პირველი საოპერო პარტია – მარო, ზაქარია ფალიაშვილის ოპერაში "დაისი" – თელავის ნიკო სულხანიშვილის სახელობის სამუსიკო სასწავლებლის მეორე კურსზე სწავლისას შეასრულა (ლირიკულ–კოლორიტურული სოპრანო); ამ სპექტაკლის შემდეგ, კომპოზიტორ სულხან ცინცაძის რეკომენდაციით, მან სწავლა თბილისის სახელმწიფო კონსერვატორიაში განაგრძო; სტუდენტობისას კონსერვატორიის საოპერო სტუდიის დადგმებში, ასრულებდა ადინას (გაეტანო დონიცეტის "სიყვარულის ნექტარი"), ვიოლეტას, ჯილდას (ჯუზეპე ვერდის "ტრავიატა", "რიგოლეტო"), მიუზეტას (ჯაკომო პუჩინის "ბოჰემა"), მაროს (ზაქარია ფალიაშვილის "დაისი") პარტიებს; 1975 წლიდან იყო ზ. ფალიაშვილის სახელობის თბილისის ოპერისა და ბალეტის თეატრის სოლისტი; ამავე წელს ის გახდა მ. გლინკას სახელობის ვოკალისტთა საკავშირო კონკურსის ლაურეატი; 1976–1977წწ. გადიოდა სტაჟირებას მილანის საოპერო თეატრ "ლა სკალაში"; იტალიიდან დაბრუნების შემდეგ მომღერალმა კვლავ განაგრძო თბილისის საოპერო თეატრში მოღვაწეობა; პარალელურად, სოლო კონცერტებსაც მართავდა, მათ შორის იყო ქართული და იტალიური მუსიკის კონცერტი ვისბადენში (1978); 1983 წელს სოლო კონცერტები მოსკოვის დიდ თეატრსა და სვეტებიან დარბაზში; 1985-1989წწ. ყოველწლიურად გამოდიოდა სანქტ-პეტერბურგში, მარინის თეატრში და გლინკას სახელობის კამერულ დარბაზში; 1989 წელს მოსკოვში, რახმანინოვის სახელობის დარბაზში; 1995 წელს კაიროს საოპერო თეატრში, კაიროშივე მან სოლისტებისათვის მასტერკლასები ჩაატარა; სანქტ-პეტერბურგსა და თბილისში მომღერალს გამართული აქვს მოცარტის, როსინის, დიმიტრი არაყიშვილის მონოგრაფიული კონცერტები; მართავდა გასტროლებს სსრკ-სა და საზღვარგარეთის ქვეყნებში (გერმანია, საფრანგეთი, იტალია, პოლონეთი, თურქეთი, ისრაელი); 2004 წლიდან არის შ. რუსთაველი სახელობის თბილისის სახელმწიფო თეატრალური უნივერსიტეტის პროფესორი; ეწევა საკონცერტო მოღვაწეობას.

წყარო: მუსიკის ენციკლოპედიური ლექსიკონი. – თბ., 2007. – გვ. 126; თბილისის ოპერისა და ბალეტის სახელმწიფო თეატრი: opera.ge; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.323

• 1999 - ღირსების ორდენი
  ქართული საოპერო
• 1992 - საქართველოს სახელმწიფო პრემია
• 1989 - საქართველოს სახალხო არტისტი