რამაზ ლაღიძე

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტი 1936 წელს.

1953 წლიდან იყო საქართველოს მეცნიერებათა აკადემიის პეტრე მელიქიშვილის სახელობის ფიზიკური და ორგანული ქიმიის ინსტიტუტის ორგანული სინთეზის ლაბორატორიის გამგე. რ. ლაღიძის შრომები ეძღვნება ძირითადად მრავალატომიანი სპირტების, აცეტილური გლიკოლებისა და მათი რთული ეთერების არენებთან კონდენსაციათა რეაქციებს. ამ გზით განხორციელდა მრავალრიცხოვანი ალიფატურ–არომატული სპირტების, ეთერების, ციკლური კეტონების, ამინებისა და ამინოთიოლების სინთეზი. აცეტილენური გლიკოლების საფუძველზე მიიღო პოლიციკლური არომატული ნახშირწყალბადები, რომელსაც აგრეთვე "ლაღიძის ნახშირწყალბადებს" უწოდებენ. სამეცნ. მოღვაწეობის პარალელურად 1952 წლიდან ლექციებს კითხულობდა ორგანულ ქიმიაში ქუთაისში ა. წულუკიძის სახელობის სახელმწიფო პედაგოგიურ ინსტიტუტში (ახლანდელი ა. წერეთლის სახელმწიფო უნივერსიტეტი), საქართველოს სოხუმის სუბტროპიკულ მეურნეობათა და საქართველოს პოლიტექნიკურ (ამჟამად სტუ) ინსტიტუტებში. მანვე საქართველოს ჯანმრთელობის დაცვის სამინისტროს ონკოლოგიის სამეცნიერო ცენტრთან ჩამოაყალიბა ბიოპრეპარატების სინთეზის ლაბორატორია (1968). ქიმიურ მეცნიერებათა დოქტორი (1952), პროფესორი (1955). მიტროფანე ლაღიძის შვილი.

წყარო: ქსე: ტ.6.–თბ.,1983.–გვ.146;  საქართველოს მეცნიერებათა ეროვნული აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ.304

• საბჭოთა კავშირის კომუნისტური პარტია, წევრი (1948-)
• საქართველოს მეცნიერებათა აკადემია, წევრ-კორესპონდენტი (1983-)

• 1986 - საქართველოს მეცნიერებათა აკადემიის პ. მელიქიშვილის სახელობის პრემია
• 1967 - საქართველოს მეცნიერებათა დამსახურებული მოღვაწე

• უალკოჰოლო სასმელების წარმოება : მ. ლაღიძის წინასიტყვაობით (ავტორი). - თბილისი, ტექნიკა და შრომა, 1953. - 384გვ.
• ყიბულის ფიქლებიდან მიღებული ფისის ფიზიკა-ქიმიური დახასიათება და მისი თვისებები, როგორც შიდაწვის ძრავებისათვის სახმარი თხევადი სათბობისა : თეზისები ქიმიის მეცნიერებათა კანდიდატის სამეცნიერო ხარიხის მოსაპოვებლად წარმოდგენილი სადისერტაციო ნაშრომისა. 1941-42 აკად. წელი (ავტორი). - თბილისი, 1942. - 4გვ.