მიხეილ რჩეულიშვილი

დაბადების ადგილი: სოფელი ვაზისუბანი, გურჯაანის რაიონი.

დაამთავრა თბილისის სახელმწიფო უნივერსიტეტის აგრონომიული ფაკულტეტი 1929 წელს.

1927 წლიდან მუშაობას იწყებს პროფ. ი. ჯანდიერთან, ახლად დაარსებულ საქართველოს მიწსახკომის ცენტრალურ ზოოტექნიკურ საცდელ სადგურში; 1929 წელს იგზავნება ქ. ლენინგრადში სსრკ-ს მეცნიერებათა აკადემიის განსაკუთრებულ ზოოლოგიის ლაბორატორიაში, სადაც სწავლობს კრანეოლოგიური და ოსტეოლოგიური კვლევის მეთოდებს, შემდგომ ქ. მოსკოვში ექსპერიმენტალური ბიოლოგიის ინსტიტუტში და ცენტრალურ გენეტიკურ სადგურში ეუფლება ზოგადი გენეტიკის და ცხვრის გენეტიკის კვლევის მეთოდებს; 1932-1940წწ. შეთავსებით მუშობს მეცხვარეობის ზონალურ საცდელ სადგურში ცხვრის გენეტიკის განყოფილების ხელმძღვანელად და მატყლის მცოდნეობის ლაბორატორიის გამგედ, მასვე ევალება სამეცნიერო ნაწილში დირექტორის მოადგილის მოვალეობის შესრულება; 1940 წლიდან მუშობს სსრკ მეცნიერებათა აკადემიის საქართველოს ფილიალის ზოოლოგიის სექტორში და შემდგომ საქართველოს მეცნიერებათა აკადემიის ზოოლოგიის ინსტიტუტში სწავლულ მდივნად და მისივე ინიციატივით შექმნილ ცხოველთა წარმოშობისა და ევოლუციის ლაბორატორიის გამგედ; 1958 წლიდან საქართველოს მეცხოველეობისა და ვეტერინარიის სამეცნიერო კვლევითი ინსტიტუტის დირექტორის მოადგილეა სამეცნიერო ნაწილში; 1959-1975წწ. მისი ხელმძღვანელობით დაარსდა გენეტიკის განყოფილება; 1976 წელს მისივე თაოსნობით საქართველოს სსრ მეცნიერების აკადემიის ზოოლოგიის ინსტიტუტთან დაარსდა მეცხოველეობის პროდუქტიულობის ამაღლების ბიოლოგიური საფუძვლების ლაბორატორია; გამოიკვლია და დაამუშვა მომთაბარე მეცხოველეობის რაციონალიზაციისა და ინტენსიფიკაციის ორიგინალური სისტემები; საქართველოში პირველმა დაიწყო მომთაბარე მეხორცული მეცხვარეობისა და ექსტრემალურ პირობებში ზებუსთან შეჯვარებით მეხორცული მეძროხეობის განვითარების შესწავლა, აგრეთვე ადგილობრივი ცხვრების გენოფონდის გამოკვლევა და ენდემურ სასწავლო-სამეცნიერო ცხოველთა გენოფონდის დაცვა და გამოყენების პრობლემების დამუშვება. სოფლის მეურნეობის მეცნიერებათა კანდიდატი(1947), სოფლის მეურნეობის მეცნიერებათა დოქტორი(1956), პროფესორი(1960), ზოოტექნიკოსი. დაჯილდოებულია მედლებით.

წყარო: საქართველოს ზოოტექნიკური განათლებისა და მეცნიერების ფუძემდებლები. – თბ., 2004. – გვ.151; ქართული საბჭოთა ენციკლოპედია : ტ. 8 .-თბ.,1984.-გვ.521

• საქართველოს გენეტიკოსთა და სელექციონერთა საზოგადოება, პრეზიდენტი (1975-1979)
• საქართველოს მეცნიერებათა აკადემია, წევრ-კორესპონდენტი (1967-)
• საქართველოს სსრ მეცნიერებათა აკადემიის მეცხოველეობის ინტენსიფიკაციის პრობლემების სამეცნიერო საბჭო, თავმჯდომარე (1976-)

• საქართველოს მეცნიერებათა დამსახურებული მოღვაწე
• ლენინის ორდენი

• საქართველოს სსრ დაბლობი ზონების საზოგადოებრივი მეურნეობის მსხვილი რქოსანი საქონლის აღწარმოების თანამედროვე პრობლემები (Author). - თბილისი, მეცნიერება, 1984. - 37გვ.