რევაზ ტაკიძე

დაბადების ადგილი: ქ. ბათუმი.

დაამთავრა ვანო სარაჯიშვილის სახელობის თბილისის სახელმწიფო კონსერვატორია 1966 წელს(საფორტეპიანო), 1973 წელს(სადირიჟორო).

1972 წლიდან მუშაობს ვ. სარაჯიშვილის სახელობის თბილისის სახელმწიფო კონსერვატორიაში საოპერო მომზადების კათედრაზე, 1972 წლიდან დირიჟორობს საქართველოს სახელმწიფო ორკესტრს; 1975 წლიდან მუშაობს ზ. ფალიაშვილის სახელობის თბილისის ოპერისა და ბალეტის თეატრში, სადაც დირიჟორობს საოპერო და საბალეტო სპექტაკლებს; ვახტანგ ჭაბუკიანთან ერთად დადგმული აქვს დავით თორაძის "გორდა" და ლუდვიგ მინკუსის "ბაიადერა", მიხაილ ლავროვსკისთან ერთად –  სერგეი პროკოფიევის "რომეო და ჯულიეტა"; 1980–1994წწ. იყო ქ. გორის მუსიკალური სასწავლებლის საოპერო სტუდიის მუსიკალური ხელმძღვანელი; 2000–2013წწ. თბილისის სახელმწიფო კონსერვატორიის საოპერო მომზადების კათედრის გამგე, დირიჟორობს კონსერვატორიის საოპერო სტუდიის სპექტაკლებს, 2000 წლიდან მთავარი დირიჟორია, მისი ხელმძღვანელობით დადგმულ სპექტაკლებში დაოსტატდნენ ახალგაზრდა მომღერლები, რომლებიც დღეს საყოველთაოდ აღიარებული არტისტები არიან: პ. ბურჭულაძე, ნ. სურგულაძე, ნ. მაჩაიძე, ქ. ქემოკლიძე, გ. გაგნიძე; 2010-2013წწ. თბილისის კონსერვატორიის სტუდენტურ ორკესტრს ხელმძღვანელობდა, რომელთანაც, სტუდენტ-სოლისტების გარდა, სიამოვნებით თანამშრომლობდნენ ისეთი ცნობილი მუსიკოსები, როგორებიც არიან ლ. ისაკაძე, ა. კორსანტია, ხ. ბუნიათიშვილი; ხშირად გამოდის სიმფონიური მუსიკის კონცერტებით. ჩატარებული აქვს ო. თაქთაქიშვილის, ნ. გუდიაშვილის, ვ. აზარაშვილის, რ. ქარუხნიშვილის, ე. ლომდარიძის საავტორო კონცერტები, აგრეთვე, ქართველ კომპოზიტორთა სიმფონიური მუსიკის საღამოები; საგასტროლო კონცერტებსა და სპექტაკლებს დირიჟორობდა რუმინეთში, ისრაელში, მალტაზე, რუსეთში, უკრაინაში, ყაზახეთში, აზერბაიჯანში, სომხეთში. თბილისის სახელმწიფო კონსერვატორიის ემერიტუს-პროფესორი.

წყარო: მუსიკის ენციკლოპედიური ლექსიკონი. – თბ., 2007. – გვ. 263; 

http://www.opera.ge/State-Opera/Conductors/revaz_takidze.aspx

• 1992 - საქართველოს სახელმწიფო პრემია
• საქართველოს ხელოვნების დამსახურებული მოღვაწე