მიხეილ ზაალიშვილი

დაბადების ადგილი: სოფელი იგოეთი, კასპის რაიონი. 

დაამთავრა ბაქოს რეალური სასწავლებელი 1885 წელს, დაბრუნდა თბილისში და სწავლა განაგრძო სამასწავლებლო ინსტიტუტში, რომელიც დაამთავრა 1887 წელს. სამასწავლებლო ინსტიტუტის დამთავრების შემდეგ სწავლის გასაგრძელებლად მიდის პოლონეთში, ნოვო-ალექსანდრიის სოფლის მეურნეობის და მეტყევეობის ინსტიტუტში, რომელიც დაამთავრა 1891 წელს; 1897 წელს დაამთავრა ქ. მოსკოვის სასოფლო-სამეურნეო ინსტიტუტი და მიიღო პირველი თანრიგის აგრონომის წოდება.

1897 წელს დაინიშნა ერევნის საოსტატო სემინარიის დამრიგებლად, სადაც ასწავლიდა საბუნებისმეტყველო საგნებსა და გეოგრაფიას. შემდეგში შეთავსებით ასწავლიდა ბუნებისმეტყველებასა და ფიზიკას ერევნის ქალთა გიმნაზიაშიც.  სომხეთში, მასწავლებლობის გარდა მუშაობდა როგორც აგრონომი და ამავე დროს იგი იყო სასოფლო-სამეურნეო საზოგადოების ერევნის განყოფილების მდივანი. 1902 წლიდან იყო გორის ამიერკავკასიის საოსტატო სასწავლებლის სემინარიის დამრიგებელი; 1907 წლიდან დაინიშნა გორის პროგიმნაზიის ინსპექტორად; 1912 წლიდან ეს პროგიმნაზია გიმნაზიად გადაკეთდა და იგი დირექტორად დანიშნეს. მან დიდი წვლილი შეიტანა საქართველოში საგანმანათლებლო და პედაგოგიური საქმიანობის განვითარებაში. იყო პირველი საბუნებისმეტყველო სახელმძღვანელოების ავტორი ქართულ ენაზე.

წყარო: განმანათლებლობა საქართველოში: იდეები და მოღვაწეები: nateba.webbreeze.net; ქართული საბჭოთა ენციკლოპედია: ტ. 4.-თბ., 1979.-გვ. 468

• მოკლე სახელმძღვანელო ბუნებისმეტყველებისა (ავტორი) // ნაწ. 2: ბოტანიკა. - ქუთაისი, თ. მთავრიშვილის და ამხ. წიგნის მაღაზიის გამოცემა, 1918. - 198, Xგვ.
• მოკლე სახელმძღვანელო ბუნებისმეტყველებისა (ავტორი) // ნაწ. 4: ზოოლოგია (სწავლა ცხოველებზე). - ქუთაისი, თ. მთავრიშვილის და ამხ. წიგნის მაღაზიის გამოცემა, 1918. - 162, II, IIIგვ.
• მოკლე სახელმძღვანელო ბუნებისმეტყველებისა (ავტორი) // ნაწ. 1: არაორგანიული ბუნება: ჰაერი, წყალი და დედამიწა. - ქუთაისი, თ. მთავრიშვილისა და ამხანაგობის წიგნის მაღაზიის გამოცემა, 1917. - 124, IIIგვ.
• მეფუტკრეობა (ავტორი). - ტფილისი, изданiе имп. Кавказск. общества сельскаго хозяйства, 1897. - 74გვ.
• საზოგადო მიწათ-მოქმედება (ავტორი). - თბილისი, "მეურნის" რედაქციის გამოცემა, 1891. - 68გვ.
• საზოგადო ზოოტეხნია ანუ საქონლის მოვლა-მოშენება (ავტორი). - თბილისი, გაზ., "მეურნეს" რედაქციის გამოცემა, 1890. - 82გვ.