ანდრია მრევლიშვილი

დაბადების ადგილი: სოფელი იყალთო, თელავის მაზრა.  

დაამთავრა თბილისის სასულიერო სემინარია 1843 წელს და გაიგზავნა თელავის სასულიერო სასწავლებლის პირველი კლასის მასწავლებლად. იმავე წელს გადმოიყვანეს თბილისში სამრევლო სკოლის მეორე კლასის მასწავლებლად. 1844 -1850წწ.  დუშეთის სამაზრო სასწავლებლის პირველი კლასის მასწავლებელი იყო; 1850 წელს კავკასიის სასწავლო ოლქის მმართველობამ გააგზავნა იგი ახალციხის სამაზრო სასწავლებლის მოსამზადებელი კლასიის მასწავლებლად; ოთხი წლის შემდეგ სასწავლებელი დაიხურა, იგი მიავლინეს რაჭაში და დაავალეს გაეხსნა პირველდაწყებითი სასწავლებელი; 1856 წელს იგი ამ სკოლის ზედამხედველის თანამდებობაზე დაამტკიცეს; 1857 წელს იგი დანიშნეს ქუთაისის პირველდაწყებითი სასწავლებლის ზედამხედველად და რუსული ენისა და მათემატიკის მასწავლებლად. ასწავლიდა სიმღერა-გალობას. მუსიკალური ხელოვნების ყველა ხერხის გამოყენებით ღრმად ნერგავდა ძველ ქართულ სიმღერა-საგალობლებს პირველდაწყებითი სასწავლებლებისა და ქუთაისის გიმნაზიის მოსწავლეებში. მის ტრადიციებზე აღიზარდა მრავალი ახალგაზრდა. მან დაიწყო ქართული სიმღერა-საგალობლების ნოტებზე გადაღება. 1878, 1884 და 1886 წლებში საქართველოში გამომავალ ჟურნალ-გაზეთებიდან ირკვევა, რომ  მას მრავალი სიმღერა-გალობა აღუდგენია, დაუხვეწია და გადაუღია ნოტებზე, რომლებიც შემდეგში რამდენჯერმე შეუსწორებია და გამოცემაც მოუწადინებია, მაგრამ მთელი რიგი მიზეზების გამო ვერ შეუსრულებია.

წყარო: ქართველ მოღვაწეთა ნეკროპოლი. წ. 1/ შეადგ., წინასიტყვაობა, შენიშვნები და საძიებელი დაურთო სოლომონ ხუციშვილმა. -თბ., 1961. -გვ.135; განმანათლებლობა საქართველოში - იდეები და მოღვაწეები: nateba.webbreeze.net