ნანა ავალიშვილი

დაბადების ადგილი: ქ. თბილისი

დაამთავრა ვანო სარაჯიშვილის სახელობის თბილისის სახელმწიფო კონსერვატორია 1961 წელს (საფორტეპიანო, პროფ. ანასტასია ვირსალაძის კლასი).

1956 წელს დაამთავრა თბილისის ზ. ფალიაშვილის სახელობის "ნიჭიერთა ათწლედი" (ფორტეპიანო); 1961 წლიდან იყო თბილისის I სამუსიკო სასწავლებლის პედაგოგი და კონცერტმაისტერი, 1964 წლიდან ვ. სარაჯიშვილის სახელობის თბილისის სახელმწიფო კონსერვატორიის კონცერტმაისტერი (საგუნდო კათედრა, ა. ბაგალიშვილის ალტის კლასი); ეწეოდა აქტიურ საკონცერტო მოღვაწეობას, როგორც სოლისტი პიანისტი–იმპროვიზატორი და დუეტში გამოდიოდა პიანისტ ნანა დიმიტრიადისთან ერთად; მას დაწერილი აქვს მუსიკა დრამატული სპექტაკლებისთვის – "ამაღამ მგონი, იქნება ქარი", "სამანიშვილის დედინაცვალი" (თბილისის რუსთაველის თეატრი), "მარშალ დეფანტიეს ბრილიანტები" (რ. გაბრიაძის მარიონეტების თეატრი); მუსიკა კინოფილმებისათვის – "ლიმონის ტორტი"(1977, რეჟისორი რ. გაბრიაძე), "სათადარიგო ბორბალი" (1978, რეჟისორი ა. დარსაველიძე), "მწვერვალის დამპყრობნი" (1977, რეჟისორი რ. გაბრიაძე, ა. დარსაველიძე), "შავი მერცხალი" (1986, რეჟისორი თ. დულარიძე).

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 12