დავით ჩქოტუა

დაბადების ადგილი: სოფელი საბერიო, სამურზაყანო.

აფხაზეთის უკანასკნელი მთავრის მიხეილ შარვაშიძის ერთადერთი ვაჟის, გიორგი შარვაშიძის ძიძიშვილი და ერთგული თანამებრძოლი. დაამთავრა ქუთაისის სათავადაზნაური გიმნაზია; 1869-1875წწ. სწავლობდა ჯერ ოდესის უნივერსიტეტის საბუნებისმეტყველო, ხოლო შემდეგ პეტერბურგის უნივერსიტეტის იურიდიულ ფაკულტეტებზე. პეტერბურგში სწავლის პერიოდში აქტიურად თანამშრომლობდა გაზეთ "დროებასთან"; იმ პერიოდში გიორგი შარვაშიძემ ჯვარი დაიწერა საქართველოს ყოფილი მეფისნაცვლის პირადი ექიმის ერასტ ანდრეევსკის ქალიშვილზე და მეუღლის მზითვად მიღებული მამულების სამართავად დავითი პეტერბურგიდან მოიწვია; დავითი თავის უმცროს ძმასთან, ნიკოლოზთან ერთად დაადანაშაულეს 1876 წლის 22 ივლისს მომხდარ ნინა ანდრეევსკაიას გატაცებასა და მკვლეოლბაში, საბოლოოდ მიუსაჯეს 20 წლიანი კატორღა; კატორღა სრულად მოიხადა და შემდეგ დასახლდა მშობლიურ სოფელ საბერიოში, სადაც მეცნიერულ მოღვაწეობას ეწეოდა; დაინტერესებული იყო რუსთველოლოგიით; 1917 წელს, გადასახლებიდან დაბრუნებულმა, ზუგდიდში მასწავლებელთა გადასამზადებელ კურსებზე წაიკითხა თავისი ცხოვრების მთავარი ნაშრომის ერთგვარი კონსპექტური მონახაზი, რომელშიც მან გამოამჟღავნა ქართული მწერლობის, მითოლოგიისა და კულტურის საფუძვლიანი ცოდნა; 1920 წელს ნაშრომის სრული ვარიანტი წარადგინა თბილისში, მსახიობთა კავშირში, სადაც იგი მოეწონათ და მისი დაბეჭდვა გადაწყვიტეს, მაგრამ მისი ხელნაწერი უგზო-უკვლოდ გაქრა. გადარჩა მხოლოდ ორი მცირე ფრაგმენტი, რომელიც აღმოჩნდა დავითის ძმისშვილის ოჯახში. მისი პირველი პუბლიკაცია ეკუთვნის სიმონ ჯანაშიას.

წყარო: ქართველ მოღვაწეთა ნეკროპოლი. წ. 1/ შეადგ., წინასიტყვაობა, შენიშვნები და საძიებელი დაურთო სოლომონ ხუციშვილმა. -თბ., 1961. -გვ.138; განმანათლებლობა საქართველოში. იდეები და მოღვაწეები: nateba.webbreeze.net