დოსითეოსი (მიტროპოლიტი)

1795 წლის 11 სექტემბერს, აღა-მაჰმად-ხანის მიერ თბილისის დარბევისას, ყიზილბაშები განსაკუთრებული სისასტიკით  ხოცავდნენ სასულიერო პირებს; ისტორიამ ვერ შემოგვინახა ყველა წამებულის სახელი, თუმცა მათ შორის კარგადაა ცნობილი დოსითეოს მიტროპოლიტი, რომელმაც არ მიატოვა თავისი სამწყსო; სხვა დატყვევებულ ღვთისმსახურებთან ერთად დოსითეოს მიტროპოლიტი მიიყვანეს მტკვრის პირას და მოსთხოვეს რჯულის უარყოფა, მაგრამ ვერანაირი სატანჯველით ვერ გატეხეს; ყიზილბაშები ხელფეხშეკრულ ეკლესიის მსახურთ სათითაოდ ყრიდნენ ადიდებულ მტკვარში; წამებისაგან ისედაც სიკვდილის პირას მისულ დოსითეოს მიტროპოლიტს "სამღვდელმთავრო შეღავათი" მისცეს - ხელფეხშეუკვრელად გადააგდეს მტკვარში; ქართული ეკლესიის მიერ დოსითეოს მიტროპოლიტი შერაცხულია წმინდანად, ხსენების დღეა 12 სექტემბერი.

წყარო: საქართველო: ენციკლოპედია: ტ.2. - თბ., 2012. - გვ.487