დარეჯან ჩიკვილაძე

დაბადების ადგილი: ქ. თბილისი.

დაამთავრა თბილისის სახელმწიფო სამედიცინო ინსტიტუტის სამკურნალო ფაკულტეტი 1972 წელს.

1972-1975წწ. იყო თბილისის სახელმწიფო სამედიცინო ინსტიტუტის მიკრობიოლოგიის კათედრის ასპირანტი; 1975-1985წწ. - ამავე კათედრის ასისტენტი; 1985-1990წწ. - უფროსი მასწავლებელი; 1990-1996წწ. - დოცენტი, სასწავლო ნაწილის გამგე; 1996 წლიდან - სამედიცინო მიკრობიოლოგიის, ვირუსოლოგიისა და იმუნოლოგიის კათედრის გამგე. ავტორია სამეცნიერო ნაშრომებისა, რომლებიც ეხება სამედიცინო მიკრობიოლოგიის აქტუალურ საკითხებს, შიდაჰოსპიტალური ინფექციის პრობლემებს. მისი რედაქციით მომზადდა და 1996-1997წწ. ორ ნაწილად გამოიცა ქართულ ენაზე ნათარგმნი სახელმძღვანელო სამედიცინო უნივერსიტეტის სტუდენტებისათვის: "სამედიცინო მიკრობიოლოგია, ვირუსოლოგია, იმუნოლოგია"; პრაქტიკული სახელმძღვანელო: "საავადმყოფოს შიდაინფექციის პროფილაქტიკა და კონტროლი"(თანაავტორი თ. კერესელიძე). თბილისის სახელმწიფო სამედიცინო უნივერსიტეტის მიკრობიოლოგიის დეპარტამენტის ხელმძღვანელი. ექიმი-მიკრობიოლოგი, მედიცინის მეცნიერებათა დოქტორი (1998), პროფესორი.

საკანდიდატო დისერტაციის თემა - "დიფუზიური გლომერულონეფრიტით დაავადებულებში მიკრობიოლოგიური და იმუნოლოგიური გამოკვლევები", დაიცვა 1980 წელს; სადოქტორო დისერტაციის თემა - "ჰოსპიტალური ინფექციების ეტიოლოგიური სტრუქტურის, ეპიდემიოლოგიური თავისებურებების, ეპიდზედამხედველობის და კონტროლის მეთოდების შედარებითი  დახასიათება (ჯანმრთელობის დაცვის მსოფლიო ორგანიზაციის მიერ რეკომენდებული ობიექტური კრიტერიუმების გამოყენებით)", დაიცვა 1998 წელს.

წყარო: ვინ ვინაა თანამედროვე ქართულ სამედიცინო მეცნიერებაში: თანამედროვე ქართველ მედიკოსთა ბიოგრაფიული ენციკლოპედია. - თბ.,.- 2000.- გვ.323; საქართველოს მეცნიერებათა დოქტორები, 1992-2006/შემდგ. და რედ.: ირინა ჯაფარიძე. -თბ., 2012. -გვ.381; თბილისის სახელმწიფო სამედიცინო უნივერსიტეტი: tsmu.edu

• სამედიცინო მიკრობიოლოგია : სახელმღვანელო უმაღლესი სამედიცინო სასწავლებლების სტუდენტებისთვის (თანაავტორი). - თბილისი, თბილ. სახელმწ. სამედ. უნ-ტი, 2016. - 584გვ. . - ISBN: 9789941084652
• სამედიცინო მიკრობიოლოგია, ვირუსოლოგია, იმუნოლოგია (რედაქტორი) // ნაწ. 1 . - თბილისი, ოპიზა, 1996. - 306გვ.