სერგო ევლახიშვილი

დაბადების ადგილი: ქ. თბილისი.

დაამთავრა თბილისის კინოსტუდიასთან არსებული კინომსახიობთა სასწავლებელი 1942 წელს; მოსკოვის ვახტანგოვის სახელობის თეატრთან არსებული ბ. შჩუკინის სახელობის თეატრალური სასწავლებელი 1950 წელს; ლენინგრადის (ახლანდ. სანქტ-პეტერბურგი) თეატრის, მუსიკისა და კინემატოგრაფიის სახელმწიფო ინსტიტუტი 1955 წელს.

1954 წელს იყო მოსკოვის კომისარჟევსკაიას სახელობის თეატრის რეჟისორი და მსახიობი; 1960-1968წწ. საქართველოს ტელესტუდიის მთავარი რეჟისორი; გადაიღო ქართული სატელევიზიო ფილმები: "გამზრდელი" (1961), "ექიმი მიდის ფეხბურთზე" (1962), "ანკესი და სეინერი" (1962), "მე თვითონ" (1966), "მიხაი ზიჩი" (1967, უნგრელ. რეჟისორ ი. მატესთან ერთად) და სხვ.; 1968-იდან საცხოვრებლად გადავიდა მოსკოვში; 1968-1987წწ. იყო მოსკოვის ცენტრალური ტელევიზიის ფერად გადაცემათა სტუდიის მთავარი რეჟისორი; 1987-2004წწ. მოსკოვის ტელევიზიისა და რადიომაუწყებლობის მუშაკთა კვალიფიკაციის ამაღლების ინსტიტუტის საეკრანო ხელოვნების კათედრის გამგე; დადგა ტელესპექტაკლები, გადაიღო ფილმ-სპექტაკლები და ფილმები, მ. შ. "ჰამლეტი" (1970, ფილმ-ბალეტი, კომპოზიტორი დ. შოსტაკოვიჩი), "პოეტის დაბადების დღე" (1973), "ოდესღაც კალიფორნიაში", "მარტინ იდენი" (ორივე 1976), "გრძელი დღეების თვე" (1978), "რისხვა" (1979), "ტროპინინები" (1984), "რევოლუციისათვის მოწოდებული" (1986), "პორტრეტი" (1987) და სხვ.; სსრკ-ში პირველი ტელეოპერა "გამზრდელის" რეჟისორი (ა. წერეთლის მიხედვით, კომპოზიტორი ნ. გიგაური, დირიჟორი ლ. კილაძე, მუსიკალური რედაქტორი ს. ლაფაური). გადაღებულია ფილმებში: "უჩინარი იანი" (სტუდენტი, 1942), "შიპკის გმირები" (ვარშინი, 1954) და სხვ. 1960 წელს მიღებული აქვს სსრკ პირველი ხარისხის დიპლომი, ტელეოპერა "გამზრდელის" რეჟისურისთვის. ოპერის მომღერალ სერგო ევლახიშვილის შვილი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 160; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge

• 1967 - სსრკ ხელოვნების დამსახურებული მოღვაწე