გიგო ერქომაიშვილი

დაბადების ადგილი: სოფელი ეკეთი, ლანჩხუთის რაიონი.

მისი პირველი მასწავლებელი მამა იყო, მოგვიანებით კი აკეთელ მომღერლებთან დაოსტატდა; 1870-იან წლებში დაუახლოვდა ცნობილ მგალობელ-მომღერალს, საზოგადო მოღვაწეს, მღვდელს ნესტორ კონტრიძს (სოფელი ლიხაური), ვისგანაც მრავალი საგალობელი შეისწავლა; 20 წლის ასაკში გიორგი ბაბილოძესთან (გამყივანი) და გიორგი იობიშვილთან ერთად ქმნის ტრიოს, რომელიც ცნობილი ხდება მთელ გურიაში; მოგვიანებით მათ შეემატათ ივლიანე კეჭაყმაძე, ნანიკო ბურძგლა, ერმილე მოლარიშვილი; ისინი სხვადასხვა სოფელში მოსმენილი სიმღერების საკუთარ ვარიანტებს ქმნიდნენ; ასე უნდა დამკვიდრებულიყო, მაგალითად, "ალიფაშას" ერთ-ერთი ვარიანტი ჯერ გიგოს ანსამბლის რეპერტუარში, ხოლო შემდეგ მთელ გურულ ფოლკლორში (ეს სიმღერა მათ პირველად ქობულეთში, სოფელ ქაქუთში, ქორწილში მოუსნმენიათ ხუცუბნელი მომღერლებისაგან); 1907 წელს მასიკო სალუქვაძის ინიციატივით, ბრიტანეთის სააქციო საზოგადოება "გრამაფონის" წარმომადგენლებმა ჩაწერეს და გრამფირფიტებზე გამოსცეს გიგოს ანსამბლის 49 სიმღერა, ამავე წელს მისი გუნდის მიერ ნამღერი 50 სიმღერა გერმანელებმა თბილისში ჩაწერეს; 1918 წელს გიგო, ანანია, არტემ და ლადიკო ერქომაიშვილები, გიორგი ბაბილოძე, ნესტორ კონტრიძე თბილისში მიიწვიეს; ორმოცი დღის მანძილზე მათგან სიმღერები ჩაიწერეს მ. ბალანჩივაძემ, დ. არაყიშვილმა, ი. კარგარეთელმა, კ. მეღვინეთუხუცესმა, კ. ფოცხვერაშვილმა ა. ბალანჩივაძემ; იმავდროულად, ერქომაიშვილები კვირაობით თბილისის "ქაშვეთის" ეკლესიაშიც გალობდნენ; 1921 წელს არტემ ერქომაიშვილი აყალიბებს ანსამბლს, რომელშიც გაერთიანდნენ გიგო, არტემ, ანანია და ლადიკო ერქომაიშვილები, გიორგი ბაბილოძე, დიმიტრი და ილარიონ პატარავები, აკაკი ბასილაშვილი, სერაფიონ ვაშალომიძე, ალიოშა წივწივაძე; 1934 წელს ერქომაიშვილების ტრიომ (გიგო, არტემ და მისი თორმეტი წლის ვაჟი დავითი) ოლიმპიადაზე წარმატება მოიპოვა (არსებობს ჩანაწერი - "ადილა"); გიგოსგან სიმღერა-გალობა ბევრმა ისწავლა; მისი ჩანაწერები ერთ-ერთი უძველესი ჩანაწერებია; მგალობელი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 166