ევდემონ I (აფხაზეთის კათოლიკოს-პატრიარქი)

1557-1578წწ. იყო აფხაზეთის (დასავლეთ საქართველო) კათოლიკოს-პატრიარქი; იმერეთის მეფეების ბაგრატ III-სა და გიორგი II-ის აქტიური თანამოაზრე დასავლეთ საქართველოს პოლიტიკურ გაერთიანებისა და კულტურულ-ეკონომიკური აღმშენებლობის საქმეში; ევდემონ I-ის სახელს უკავშირდება ბიჭვინთიდან საკათალიკოსო რეზიდენციის გელათში გადატანა; აღმოსავლეთ საქართველოს კათოლიკოს-პატრიარქ მალაქიასთან ერთად ხელმძღვანელობდა საეკლესიო კრებას, რომელმაც სიკვდილით დასჯა დაუწესა ტყვეთა გამყიდველებს და მოაწესრიგა საეკლესიო მმართველობის დარღვეული წესები; მან მოახატვინა გელათის წმინდა გიორგის ტაძრის ნაწილი; შეაკეთა და მოახატვინა მოქვისა და ბიჭვინთის მონასტრების ნაწილი, რომელთა წარწერებში მოხსენებულია თვით ევდემონ I; 1568 წელს მოაჭედვინა ბიჭვინთის ღვთისმშობლის ოქროს ხატი; ცნობილია ევდემონ I-ის დაკვეთით გადაწერილი გელათის ხელნაწერები; ბიჭვინთის საკათოლიკოსო მამულს საკუთარი ხარჯით შეუძინა ახალი მამულები და ძვირფასი ინვენტარი.

წყარო: საქართველო: ენციკლოპედია: ტ.2. - თბ., 2012. - გვ.549