შალვა იაშვილი

დაბადების ადგილი: სოფელი ოჯალეში, ტყიბულის რაიონი.

ქორეოგრაფიულ ხელოვნებას ეზიარა ქუთაისის ვაჟთა I გიმნაზიში; 1913-1917წწ. პირველ წარმატებებს მიაღწია ქუთაისში და 1916 წელს ფოთში, ქართული ცეკვის კონკურსებზე; 1918-1920წწ. სწავლობდა ოდესის ქორეოგრაფიულ-თეატრალურ სტუდიაში; 1920 წლიდან საკუთარი ქორეოგრაფიული სტუდიები გახსნა ვოლგოგრადსა და იალტაში, 1923 წელს სოხუმში, 1927 წელს ბათუმში; 1929 წელს თბილისის საქალაქო განათლების სახალხო კომისარიატთან დააარსა მოცეკვავეთა ანსამბლი; 1930 წელს საქართველოს სახელმწიფო ფილარმონიასთან დააარსა აღმოსავლეთ-ეთნოგრაფიული ანსამბლი; 1941 წელს ქუთაისის ლითოფონის ქარხნის, წყალტუბოსა და ტყიბულის კულტურის სახლებთან დააარსა სიმღერისა და ცეკვის ანსამბლები; იყო ერთ-ერთი პირველი, ვინც სმენადაქვეითებული და მეტყველებადაქვეითებული ადამიანებისაგან ჩამოაყალიბა ქორეოგრაფიული ანსამბლი; 1956 წლიდან მოღვაწეობდა თბილისის ყრუ-მუნჯთა სახლში; სხვადასხვა დროს ხელმძღვანელობდა თვითმოქმედ კოლექტივებს; ქორეოგრაფი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 218