თინათინ შარაძენიძე

დაბადების ადგილი: ქ. ქუთაისი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1942 წელს.

ამავე წლიდან კითხულობდა ლექციებს ენათმეცნიერების შესავალსა და ზოგად ენათმეცნიერებაში; 1947-1953წწ. ასწავლიდა სვანურ ენას; 1942-1946წწ. კითხულობდა ქართული ენის კურსს შოთა რუსთაველის სახელობის თეატრალურ ინსტიტუტში; 1957 წლიდან იყო ზოგადი ენათმეცნიერების განყოფილების გამგე საქართველოს მეცნიერებათა აკადემიის ენათმეცნიერების ინსტიტუტში; იყო თანამედროვე ქართული ენის განმარტებითი ლექსიკონის ერთ-ერთი შემდგენელი და ლექსიკონის მეექვსე ტომის თანარედაქტორი; აქტიურად მუშაობდა ზოგადი ენათმეცნიერების თეორიისა და იბერიულ-კავკასიური ენების შესწავლის სფეროში; იყო თეორიული ენათმეცნიერების ერთ-ერთი თვალსაჩინო სპეციალისტი. ავტორია ასზე მეტი სამეცნიერო შრომის, მათ შორის რვა წიგნისა ქართულ და რუსულ ენებზე. ზოგადენათმეცნიერული საკითხების კვლევისას ფართოდ იყენებდა და ეყრდნობოდა ქართული და ქართველური ენების მონაცემებს. განსაკუთრებული მნიშვნელობისაა მისი გამოკვლევები სვანური ენის შესახებ. იგი იყო ამ ენის თვალსაჩინო მკვლევარი და სპეციალისტი. ფართო და მრავალმხრივი იყო მისი მეცნიერულ-ორგანიზატორული და საზოგადოებრივი მოღვაწეობა. 

წყარო: ice.ge; ენციკლოპედია: ქართული ენა. -თბ., 2008.- გვ.541

• საქართველოს მეცნიერებათა აკადემია, წევრ-კორესპონდენტი (1974-)
• სსრკ მეცნიერებათა აკადემიის "საბჭოთა ენათმეცნიერების თეორიის" საბჭო, წევრი

• 1971 - საქართველოს სახელმწიფო პრემია
• 1968 - საქართველოს მეცნიერებათა დამსახურებული მოღვაწე
• საპატიო ნიშნის ორდენი

• არნოლდ ჩიქობავა (ავტორი). - თბილისი, მეცნიერება, 1978. - 82გვ.
• ი.ა. ბოდუენ დე კურტენეს ლინგვისტური თეორია და მისი ადგილი XIX-XX საუკ. ენათმეცნიერებაში (ავტორი). - თბილისი, მეცნიერება, 1978. - 239გვ.
• ენისა და მეტყველების ურთიერთობის პრობლემა (ავტორი). - თბილისი, მეცნიერება, 1974. - 174გვ.
• თანამედროვე ენათმეცნიერების თეორიული საკითხები (ავტორი). - თბილისი, მეცნიერება, 1972. - 438გვ.
• ენათა კლასიფიკაციის პრინციპები (ავტორი). - თბილისი, საქ. სსრ მეცნ. აკად. გამ-ბა, 1958. - 543გვ.