გიორგი VI (იმერეთის მეფე)

იმერეთის მეფე 1703-1720წწ.(დროგამოშვებით), ალექსანდრე IV-ის ძე; 1703 წელს ოსმალთა დახმარებით გამეფდა, მაგრამ იმერეთს ფაქტობრივად გიორგი-მალაქია აბაშიძე განაგებდა, რომელიც ქართულ ისტორიოგრაფიაში დამკვიდრებული ტრადიციით გიორგი V-დ ითვლება; გიორგი VI-ს მხარს უჭერდა ქართლის სამეფო სახლი და იმერელ ფეოდალთა დიდი ნაწილი; 1707 წელს გიორგი VI-მ დაამარცხა აბაშიძე და მეფობა დროებით განიმტკიცა; 1711 წელს ფეოდალთა ერთმა ჯგუფმა გიორგი VI გადააყენა და მამია III გურიელი გაამეფა; გიორგი VI ჯერ ქართლში გადავიდა ვახტანგ ბატონიშვილთან(ვახტანგ VI), ხოლო მერე ახალციხეში ფაშისთვის დახმარების სათხოვნელად; 1712 წელს ჩხარის ბრძოლაში გიორგი VI-მ დაამარცხა მამია III გურიელი და კვლავ დაიკავა ტახტი, მაგრამ ურჩმა ფეოდალებმა 1713 წელს ისევ მამია გურიელი გაამეფეს; გურიელი მალე გარდაიცვალა(1714) და იგი მისმა შვილმა გიორგი გურიელმა შეცვალა; 1714 წელს ოსმალთა დახმარებით გიორგი VI-მ ისევ დაიბრუნა ტახტი, მაგრამ 1716 წელს ბეჟან დადიანმა და სხვა თავადებმა ახალციხის ფაშას დახმარებით სიმონეთის ბრძოლაში დაამარცხეს; გიორგი VI იძულებული გახდა ჯერ ახალციხეში, შემდეგ კი სტამბოლში წასულიყო; 1719 წელს ოსმალთა დახმარებით გიორგი VI კვლავ გამეფდა; ბეჟან დადიანის, შოშიტა III რაჭის ერისთავისა და ზურაბ აბაშიძის წაქეზებით სიმონ აბაშიძემ გიორგი VI ვერაგულად მოაკვლევინა.

წყარო: საქართველო: ენციკლოპედია: ტ.2. - თბ., 2012. - გვ.22