გიორგი დოდისი

XII საუკუნის ქართველი კალიგრაფი; მოღვაწეობდა იერუსალიმის ჯვრის მონასტერში; 1156 წელს გადაუწერია სვინაქსარი (ხელნაწერთა ეროვნული ცენტრი, H 1661); ხელნაწერი შესრულებულია ნუსხურით, ერთ სვეტად, წერილი, ლამაზი, თანაბარი ასოებით; უხვადაა გამოყენებული სინგური (საზედაო ასოები, ცალკეული სტრიქონები), რაც ფურცლებს დეკორატიულ და სადღესასწაულო იერს ანიჭებს; წიგნის დასაწყისში გამოსახულია ქართული ორნამენტებიან თაღოვან ჩარჩოში ჩასმული ჯვარი, ბოლოში მოხსენებულია გადამწერის სახელი.

წყარო: საქართველო: ენციკლოპედია: ტ.2. - თბ., 2012. - გვ.27