გიორგი საღარაძე

დაბადების ადგილი: ქ. ქუთაისი.

სწავლობდა თბილისის სახელმწიფო უნივერსიტეტში; რუსთაველის თეატრთან არსებულ სტუდიაში.

სასცენო ხელოვნებას ჯერ კიდევ ქუთაისში ეზიარა, როდესაც სკოლის მოსწავლემ პირველი ნაბიჯები გადადგა პროფესიული თეატრის სცენაზე; შემდეგ ჩაირიცხა შ. რუსთაველის თეატრის დასში და მის სცენაზე გაიარა თავისი შემოქმედებითი ცხოვრების ნახევარ საუკუნეზე მეტი; მისი მოღვაწეობის პირველი ათი წელი დაკავშირებულია ა. ახმეტელის სახელთან; მსახიობმა ამ დიდი რეჟისორის ჰეროიკულ-რომანტიკულ სპექტაკლებში("ანზორი", "ლამარა", "ყაჩაღები") დასამახსოვრებელი სახეები შექმნა; შემდგომ ხელოვანმა შემოქმედებითი ბიოგრაფია გაიმდიდრა შესანიშნავად შესრულებული როლებით: ფარსადანი("არსენა"), ლუარსაბი("გიორგი სააკაძე"), ლებან ხიმშიაშვილი("სამშობლო"), დათო("ღალატი"), მუროვი("უდანაშაულო დამნაშავენი"), ხოვიჩი ("ოლეკო დუნდიჩი"), კუზმიჩი("სადგურის უფროსი"), პოლკოვნიკი ლებოვი("პირველი ნაბიჯი"), ალექსანდრე ჭავჭავაძე("ნიკოლოზ ბარათაშვილი"), არჩილი("ოთარაანთ ქვრივი"), შუქრი("ჩაძირული ქვები"); მან თვალსაჩინო წვლილი შეიტანა ქართულ საესტრადო ხელოვნებაშიც; თავის პარტნიორთან, მსახიობ სტეფანე ჯაფარიძესთან ერთად იგი იყო ქართული ესტრადის მშვენება; ამ შესანიშნავი დუეტის მახვილი სატირა ამხილებდა ცხოვრებისეულ მანკიერებებს, ხოლო ომის პერიოდში განსაკუთრებული ძალით გაისმოდა მათი სიტყვა როგორც ლახვარი, მიმართული მტრების წინააღმდეგ; მან კვალი დატოვა ქართულ კინემატოგრაფიაშიც, მონაწილეობდა სატელევიზიო დადგმებში; მისი შემოქმედება გამოირჩეოდა არტისტული მომხიბვლელობით, დახვეწილი მხატვრული ტაქტით და მაღალი გემოვნებით.

წყარო: მამულიშვილთა სავანე. - თბ., 1994. - გვ.321

• სსრკ სახელმწიფო პრემია
• საქართველოს სახალხო არტისტი
• საპატიო ნიშნის ორდენი
• წითელი დროშის ორდენი