ლუარსაბ II (ქართლის მეფე)

ქართლის მეფე 1606-1615წწ.. მისი გამეფების წინა ხანებში შაჰ აბას I-მა თბილისი დაიკავა და ციხეში ყიზილბაშთა გარნიზონი ჩააყენა, თუმცა ქალაქი ქართველთა ხელთ იყო. ლუარსაბ II-მ თბილისის მოურავად გიორგი სააკაძე დანიშნა. 1610 წელს ლუარსაბ II ირანში ეახლა შაჰ აბას I-ს, რომელმაც ამ ვიზიტის შედეგად მას დაუბრუნა თბილისის ციხე. ლუარსაბ II-ის დროს შეიკრა კახეთისა და ქართლის კავშირი, რომლის მიზანი იყო ერთობლივი ბრძოლა ირანის აგრესიის წინააღმდეგ. 1614 წლის დასაწყისში, შაჰ აბას I-ის ლაშქრობისას, ლუარსაბ II იძულებული გახდა იმერეთში გახიზნულიყო. თბილისი კვლავ ირანელებმა დაიკავეს. 1614 წლის ოქტომბერში ლუარსაბ II ხელთ იგდო შაჰ აბას I-მა, ირანში წაიყვანა და გამაჰმადიანებაზე უარის თქმის გამო შირაზის ციხეში დაახრჩობინა. ლუარსაბ II ქართულმა ეკლესიამ წმინდანად შერაცხა.

წყარო: თბილისი: ენციკლოპედია.- თბ., 2002. - გვ.632