ეფთვიმე I (აფხაზეთის კათოლიკოს-პატრიარქი)

აფხაზეთის (დასავლეთ საქართველოს) კათოლიკოს-პატრიარქი 1578-1616 წლებში. ადრე იყო მოქვის მთავარეპისკოპოსი-მოქველი. ბიჭვინთის საკათოლიკოსოს შეუძინა დიდძალი მოძრავი ქონება: თვალ-მარგალიტით შემკული, ძვირფასი ქსოვილებისაგან დამზადებული საპატრიარქო შესამოსელი, ოქრო-ვერცხლისაგან ნაკეთები სარიტუალო ინვენტარი, მდიდრულად მოკაზმული საეკლესიო წიგნები, "ქართლის ცხოვრება", თავისივე გადაწერილი გულანი და სხვ. ამასთან პირადი ქონებაც ეკლესიის საკუთრებად აქცია. კერძოდ, ოდიშის მთავრის, ლევან II დადიანს, ადგილ-მამულის საკათალიკოსოსათვის გადასაცემად მისცა დიდი რაოდენობით ძვირფასი ნივთი. კათოლიკოსმა შეამკო მოქვის ტაძარი. სპეციალურად მოაჭედვინა და შესწირა მას მოქვის ღვთისმშობლის ხატი. მისი შეკვეთით გადაიწერა უამრავი ხელნაწერი, რომლებმაც გაამდიდრა საქართველოს თითქმის ყველა კუთხის ეკლესია-მონასტერი.

წყარო: საქართველო: ენციკლოპედია: ტ.III.–თბ., 2014.–გვ.110