ლევან V დადიანი

1805-1840წწ. ოდიშის მთავარი, გრიგოლ დადიანის ძე; მამის გარდაცვალების დროს მძევლად ჰყავდა აფხაზეთის მთავარს ქელიშბეი შარვაშიძეს, რომლისგან გათავისუფლება 1805 წლის გაზაფხულამდე ვერ მოხერხდა. თავდაპირველად  მისი მცირეწლოვანების გამო ოდიშის სამთავროს 4 წევრისგან შემდგარი საბჭოს დახმარებით განაგებდა დედამისი - დედოფალი ნინო (1805-810): 1811 წ-დან ლევან V უშუალოდ შეუდგა სამთავროს მართვა-გამგეობას. აქტიურად მონაწილეობდა რუსეთის ხელისუფლების მიერ დასავლეთ საქართველოში მოწყობილ სამხედრო ექსპედიციებში: 1809 მონაწილეობდა ფოთის აღებაში, 1810 - იმერეთის სამეფოს დამორჩილებაში, 1819-1820წწ. იმერეთისა და გურიის აჯანყების ჩახშობაში. ასევე დაეხმარა მეფის რუსეთს აფხაზეთის სამთავროში რუსეთის ხელისუფლების განმტკიცებაში. 1813 წელს ლევან V შემოიერთა სამურზაყანო, რომელსაც 1840 წლამდე მართავდა. მის დროს, 1830 წელს ოდიშის სამთავროში დაარსდა პირველი სასწავლებელი - მარტვილის სასულიერო სასწავლებელი. 1840 წელს უარი თქვა სამთავრო ტახტზე თავისი შვილის დავითის სასარგებლოდ, თუმცა მთავრის ტიტულს სიკვდილამდე ატარებდა. 

წყარო: ქართული საბჭოთა ენციკლოპედია: ტ. 6.-თბ., 1983.-გვ.157