აკაკი ვასაძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის დასავლეთ ევროპისა ენებისა და ლიტერატურის ფაკულტეტი 1962 წელს.

1965 წელს მეთევზე-მეზღვაურად ახლდა ქართულ საოკეანო თევზმჭერ ფლოტს. 1962 წლიდან მუშაობდა შოთა რუსთაველის სახელობის ქართული ლიტერატურის ინსტიტუტში მეცნიერ-თანამშრომლად. პირველი მოთხრობა "გარსია" 1962 წელს გამოაქვეყნა ჟურნალ "მნათობში", პირველი წიგნი-მხატვრული ნარკვევების კრებული "ქართველები ოკეანეში" 1968 წელს. გამოქვეყნებული აქვს მოთხრობების კრებულები: "უჩვეულო დღეები" (1971), "მოთხრობები"  (1974), ლექსების კრებული "თეთრი ნავი" (1978), ლექსებისა და პოემების კრებული "გამხელა"(1985), პროზაული კრებული "სამი ამბავი" (1988), ესეები და ნარკვევევი "ლექსი და შემოქმედება" (1975), "პოეზიის პრინციპები" (1987) და სხვ. მის სამეცნიერო ნაშრომებში დასმულია ლიტერატურის ისტორიისა და თეორიის ფსიქოლოგიის, ესთეტიკის, ხელოვნებათმცოდნეობის პრობლემები. აკაკი ვასაძემ ჩვენში ახალი მეცნიერული დისციპლინის-მხატვრული შემოქმედების ფსიქოლოგიის საკითხებს მიუძღვნა ნაშრომები: "მხატვრული გრძნობის პრობლემა" (1975, რუს. ენაზე 1978), "მხატვრული შემოქმედების ფსიქოლოგიის საკითხები" (1979). თარგმნა ჟ. პ. სარტრის, ჰ. უელსის, ა. პუშკინის, და სხვათა ნაწარმოებები.

წყარო: საქართველო: ენციკლოპედია: ტ.III.–თბ., 2014.-გვ.191

• იხსენით ჩვენი სულები : მოთხრობები (ავტორი). - თბილისი, მერანი, 1990. - 109გვ.
• პოეზიის პრინციპები (ავტორი). - თბილისი, საბჭ.საქართველო, 1987. - 477გვ.
• ლექსი და შემოქმედება : ქართული ლიტერატურის მაგალითზე (ავტორი). - თბილისი, საბჭ. საქართველო, 1975. - 173გვ.
• ქართველები ოკეანეში : მხატვრული ნარკვევი (ავტორი). - თბილისი, ნაკადული, 1968. - 61გვ.