ვახტანგ II (აღმოსავლეთ საქართველოს მეფე)

ვახტანგ II იყო აღმოსავლეთ საქართველოს მეფე 1289–1292 წლებში, დავით VI ნარინის ძე. მეფედ დასვა არღუნ ყაენმა ხუტლუბუღას რჩევით იმ ანგარიშით, რომ იგი დავით ნარინის გარდაცვალების შემდეგ მემკვიდრეობით მიიღებდა დასავლეთ საქართველოს ტახტსაც. ამ გზით მონღოლთა მფლობელობაში გაერთიანდებოდა ლიხსიქითა საქართველოც. ვახტანგ II-ის აღმზრდელი ყოფილა მწიგნობარი ვინმე ფარსმანის შვილი. ვახტანგ II დინჯი და წინდახედული მმართველი, ქვეშევრდომების მიმართ მოწყალე და გულუხვი, მართლმსაჯულების პირუთვნელი დამცველი გამოდგა. მან თვითონ აიღო ხელში ქვეყნის მმართველობა და ხუტლუბუღას თვითნებობის უფლება არ მისცა, ამის გამო მათ შორის მტრობა ჩამოვარდა. ხუტლუბუღამ ვახტანგს დემეტრე II-ის ვაჟი დავითი (შემდგომში დავით VIII) დაუპირისპირა, მაგრამ ვერაფერს გახდა. ვახტანგ II მოულოდნელად გარდაიცვალა.

წყარო: საქართველო: ენციკლოპედია: ტ.III.–თბ., 2014.-გვ.224