ბაბკენ ნერსესიანი

დაბადების ადგილი: ქ. თბილისი.

1933 წლიდან დაიწყო მისი სამსახიობო მოღვაწეობა თბილისში, ჯერ კიდევ სკოლის ასაკში სკოლის დრამატულ წრეში, ამავე დროს მონაწილეობდა მასობრივ სცენებში თბილისის სომხური დრამის თეატრის სპექტაკლებში. 1934-1944 წლებში მუშაობდა თბილისის მოზარდ მაყურებელთა სომხურ თეატრში, სადაც შექმნა შემდეგი სახეები: ჰამბო (ო. თუმანიანის "გიქორი"), ნაზარი (დ. დემირჭიანის "მამაცი ნაზარი"), ჩაპაევი (ა. ფურმანოვის "ჩაპაევი"), გოში (ლ. მიქაელიანის "გოში"), არსენა (ს. შანშიაშვილის "არსენა"), ოსმან აღა (დ. ჭონქაძის "სურამის ციხე"), ზამბახოვი (გ. სუნდუკიანის "ხათაბალა"), ფერდინანდი (ფ. შილერის "ვერაგობა და სიყვარული") და სხვა. 1944-1955 წლებში ბ. ნერსესიანი თბილისის ს. შაუმიანის სახ. სომხური თეატრის მსახიობი იყო. მის მიერ შესრულებული როლებიდან განსაკუთრებულად აღსანიშნავია: ბალაბეკი (ნ. ზარიანის "საცდელი მინდორი"), შუქრი (ი. მოსაშვილის "ჩაძირული ქვები"), პეპო (გ. სუნდუკიანის "პეპო"), არბენინი (მ. ლერმონტოვის "მასკარადი"), კაჯარი (ს. ვურგუნის "ვაგიფი"), ონისე (ს. შანშიაშვილის "ხევისბერი გოჩა"), ფრანცი (ფ. შილერის "ყაჩაღები"), ნეზნამოვი (ა. ოსტროვსკის "უდანაშაულო დამნაშავენი") სოსი (ს. ავჩიანის "სოსი და ვარდითერი"), ვარაზდატი (ლ. მიქაელიანის "ვარაზდატი") და სხვა. 1955 წლიდან გარდაცვალებამდე ერევნის გ. სუნდუკიანის სახ. სომხური დრამის თეატრში მოღვაწეობდა. წარმატებით ასრულებდა სახასიათო, კომიკურ და ტრაგიკულ როლებს: პეპო (სუნდუკიანის "პეპო"), გევორქი (ბორიანის "ერთ ჭერქვეშ") და სხვა. შექმნა ლენინის სცენური სახე (დარიანის "რესპუბლიკის თავჯდომარე"), შ. რუსთაველის სახ. თბილისის სახელმწიფო თეატრის სპექტაკლში "პეპო" ქართულ ენაზე შეასრულა პეპოს როლი. 1957 წლიდან მოღვაწეობდა კინოში. მხატვრული კითხვის ოსტატი, მიღებული აქვს სახელმწიფო ჯილდოები.

წყარო: ქართული საბჭოთა ენციკლოპედია: ტ.7-თბ., 1984.-გვ.394; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.72 

• სკკპ, წევრი (1972-)

• 1972 - სსრკ სახალხო არტისტი
• 1961 - სომხეთის სახალხო არტისტი
• 1955 - საქართველოს დამსახურებული არტისტი
• 1953 - საქართველოს სახალხო არტისტი
• წითელი დროშის ორდენი