ნადიმ ნიჟარაძე

დაბადების ადგილი: სოფელი ვაიო, ქედის რაიონი.

დაამთავრა ბათუმის პედაგოგიური სასწავლებელი 1930 წელს; 1936 წელს დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი.

მუშაობა დაიწყო ქობულეთის სუბტროპიკულ ტექნიკუმში, შემდეგ ბათუმში ეკავა სხვადასხვა პასუხსაგები თანამდებობა, რომელსაც წარმატებით უთავსებდა სამეცნიერო-პედაგოგიურ მოღვაწეობას. 1936 წელს დაინიშნა აჭარის სახელმწიფო მხარეთმცოდნეობის მუზეუმის დირექტორად; 1938-1944წწ. აჭარის განათლების სახალხო კომისარია (მინისტრი); ამავე წელს სათავეში ჩაუდგა საქართველოს გეოგრაფიული საზოგადოების ბათუმის ფილიალს; 1944 წელს იგი თბილისის სახელმწიფო უნივერსიტეტშია, კითხულობდა ლექციებს სსრკ ფიზიკურ გეოგრაფიაში. ამავე დროს მუშაობდა ვახუშტი ბაგრატიონის სახელობის გეოგრაფიის ინსტიტუტში, გორის ნიკოლოზ ბარათაშვილის სახელობის და ბათუმის შოთა რუსთაველის სახელობის პედაგოგიურ ინსტიტუტებში; 1946 წელს დაბრუნდა ბათუმში და იყო აჭარის ასსრ მინისტრთა საბჭოსთან არსებული კულტურულ-საგანმანათლებლო დაწესებულებების სამმართველოს უფროსი; 1949-1954წწ. ბათუმის შოთა რუსთაველის სახელობის პედაგოგიური ინსტიტუტის რექტორია; 1954 წლიდან გეოგრაფიის კეთედრის გამგე. მის საკანდიდატო ნაშრომში პირველად არის მოცემული აჭარის მეცხოველეობის სრულყოფილი დახასიათება და დასახულია მისი შემდგომი განვითარების პერსპექტივები. მისი კვლევის ობიექტი ძირითადად იყო აჭარის ასსრ კომპლექსურ-გეოგრაფიული შესწავლა. გამოქვეყნებული აქვს 50-ზე მეტი სამეცნიერო ნაშრომი. მიღებული აქვს სახელმწიფო ჯილდოები, მათ შორის "უმაღლესი სკოლის წარჩინებულის" წოდება. გეოგრაფიულ მეცნიერებათა დოქტორი, პროფესორი (1972).

საკანდიდატო დისერტაციის თემა - "აჭარის ალპური მეურნეობა"; დაიცვა 1944 წელს; სადოქტორო დისერტაციის თემა -"დაბლობებისა და მთიანი რიონების მოსახლეობის ცხოვრების დონის დაახლოების ეკონომიკურ-გეოგრაფიული პრობლემები, აჭარის ასსრ მაგალითზე", დაიცვა 1970 წელს.

 წყარო: ქართული საბჭოთა ენციკლოპედია: ტ.7-თბ., 1984.-გვ.442; ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.210

• საბჭოთა კავშირის კომუნისტური პარტია, წევრი (1939-)
• საქართველოს გეოგრაფიული საზოგადოება, წევრი

• 1982 - აჭარის ასსრ მეცნიერების დამსახურებული მოღვაწე
• 1967 - საქართველოს სსრ კულტურის დამსახურებული მუშაკი

• საბჭოთა აჭარა 50 წლისაა (ავტორი). - ბათუმი, საბჭ. აჭარა, 1970. - 94გვ.
• აჭარის ასსრ : სახალხო მეურნეობა და კულტურა (თანაავტორი). - თბილისი, საბჭ. საქართველო, 1967. - 155გვ.
• აჭარის ალპური მეურნეობა. (საიალაღო მეურნეობა) (ავტორი). - ბათუმი, აჭარის ასსრ სახელმწ. გამ-ბა, 1948. - 111გვ.