ნიკოლოზ ქართველიშვილი

დაბადების ადგილი: ქ. თბილისი.

დაამთავრა თბილისის გიმნაზია, განათლება მიიღო ჯერ მოსკოვის, შემდეგ პარიზის კონსერვატორიაში.

სამშობლოში დაბრუნების შემდეგ აქტიურად მონაწილეობდა მუსიკალურ–საზოგადოებრივ ცხოვრებაში; იყო "ქართული ფილარმონიული საზოგადოების" დაარსების(1905) ერთ–ერთი მოთავე, "ქართული დრამატული საზოგადოების" თავმჯდომარე, "წერა–კითხვის გამავრცელებელი საზოგადოების" აქტიური წევრი; საკუთარი ხარჯით დააარსა "ახალგაზრდა მომღერალთა გუნდი"(რომელშიც მოგვიანებით ს. კავსაძე მღეროდა); ქართულ ენაზე თარგმნილი ოპერის პირველი დირიჟორი და რეჟისორი; 1920–1921წწ. იყო თბილისის ოპერისა და ბალეტის თეატრის კომისარი; მისი თაოსნობით დაიდგა ბევრი სპექტაკლი, მათ შორის კომპოზიტორ გოგნიაშვილის პირველი ქართული ოპერა "ქრისტინე"; დიდი ღვაწლი მიუძღვის ქართველი საოპერო მომღერლების აღზრდაში; მატერიალურ დახმარებას უწევდა ქართველ მსახიობებს; მუსიკალურ–საზოგადო მოღვაწე.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 478