მამია V გურიელი

გურიის უკანასკნელი მთავარი 1809-1826 წლებში, სვიმონ III გურიელის ძე. 1809 წელს რუსეთს მფარველობაში მიღება სთხოვა. 1810 წლის 19 ივნისის ხელშეკრულებით გურია ავტონომიური უფლებებით რუსეთის იმპერიაში შევიდა. ატარებდა ანტიოსმალურ პოლიტიკას. გარდაქმნა მმართველობის სისტემა, შემოიღო მკაცრი ანგარიშიანობა, დააწესა ბაზრობა ნაგომარში, ხელს უწყობდა შინამრეწველობის განვითარებას, ევროპული წეს-ჩვეულებების დანერგვას, ტექნიკური კულტურების (ინდიგო, რამი) გავრცელებას. დააარსა ქსენონი, წამოიწყო დიდი სამშენებლო სამუშაოები, ხელს უწყობდა ვაჭრობის განვითარებას. 1819-1820 წწ. იმერეთის აჯანყების დროს იძულებული გახდა რუსეთის მხარეზე დამდგარიყო.

წყარო: ქართული საბჭოთა ენციკლოპედია: ტ. 6.-თბ., 1983.-გვ.396