ოტო სიმონსონი

დაბადების ადგილი: ქ. დრეზდენი, გერმანია.

დაამთავრა პეტერბურგის სამხატვრო აკადემია 1858 წელს.

1858 წელს პეტერბურგის სამხატვრო აკადემიამ მიანიჭა არქიტექტურის აკადემიკოსის წოდება და კავკასიის მეფისნაცვლის მიწვევით გადმოვიდა მის კანცელარიაში შტატგარეშე არქიტექტორად; ორმოცზე მეტი წლის განმავლობაში ეწეოდა ინტენსიურ მუშაობას როგორც დამპროექტებელი: ადგენდა ტიპურ პროექტებს საფოსტო და საინჟინრო უწყებებისათვის, ეკლესიების პროექტებს კავკასიის სხვადასხვა პუნქტისათვის (მათ შორის ყვარლის ციხესიმაგრის, თბილისის კუკიის ეკლესიის და სხვა); XIX საუკუნის მიწურულს ააშენა აბასთუმნის ეკლესია, რომელშიც ძველი ქართული ხუროთმოძღვრების ფორმებია გამოყენებული; 1859 წელს ბარიატინსკის პირადი ბრძანებით შეადგინა ესკიზური პროექტი ალექსანდრეს პლაცზე საზოგადოებრივი ბაღის მოწყობისა; ამ დროიდან ჩაეყარა საფუძველი ალექსანდრეს ბაღს (ცხრა აპრილის ბაღი); შეადგინა ქაშვეთის წმინდა გიორგის ეკლესიის ახალი გალავნის პროექტი; მის სახელთანაა დაკავშირებული მეფისნაცვლის სასახლის ნაწილობრივი (1858-1859), შემდეგ კი მთლიანი რეკონსტრუქცია (მოსწავლე ახალგაზრდობის რესპუბლიკური სასახლე) ინტერიერში განსაკუთრებით გამოირჩევა ე. წ. სარკეებიანი დარბაზი. დასავლეთიდან და სამხრეთიდან სასახლეს ბაღი ეკვრის. ბაღისკენ მიმართულ აივანზე ცნობილი კინოფილმის "ქეთო და კოტე"-ს კადრებია გადაღებული; შეადგინა საზოგადოებრივი და სახელმწიფო დანიშნულების შენობათა პროექტები, შეასრულა დეკორატიული სამუშაოები თბილისის თეატრის შენობაში (1860-1861); მისი პროექტით აშენდა მრავალი საცხოვრებელი სახლი: ი. თამაშევის 1872 (გალაკტიონ ტაბიძის ქუჩაზე), ი. ზუბალაშვილის 1879 (ახლანდელი ლ. ასათიანის ქუჩაზე) და სხვა; 1909 წლიდან თავი დაანება მუშაობას და გადავიდა რიგაში, სადაც გარდაიცვალა; XIX საუკუნის ბოლო ათეული წლების თვალსაჩინო არქიტექტორთაგანი თბილისში. 

წყარო: თბილისი: ენციკლოპედია.- თბ., 2002. - გვ.830; http://www.geni.com/people/Otto-Simonson/6000000000459565833