სიაუში

XVI საუკუნის ქართველი მხატვარ-მინიატიურისტი. მოღვაწეობდა ირანში, შაჰ-თამაზის კარზე. ჩვენამდე მოაღწია მისმა 2 მინიატიურამ. პირველზე შავარდენია გამოსახული (არშიაზე სპარსული წარწერაა — "სიაუშის ხელობა", ინახება პეტერბურგის მ. სალტიკოვ-შჩედრინის სახელობის საჯარო ბიბლიოთეკაში), მეორე ნადირობის სცენას გამოსახავს (დაცულია პარიზის ეროვნულ ბიბლიოთეკაში). სიაუშის ცხოვრებისა და მოღვაწეობის შესახებ საყურადღებო ცნობებს გვაწვდის XVI საუკუნის დასასრულისა - XVII საუკუნის დასაწყისის ირანელი ისტორიკოსის ისქანდერ მუნშის თხზულება: "ქვეყნის დამამშვენებელი ისტორია აბასისა".

წყარო: ქართული საბჭოთა ენციკლოპედია, ტ. 9, გვ. 320, თბ., 1985; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge