ვალტერ სიმენსი

უმაღლესი ტექნიკური განათლება ქ. მეცენდორფში მიიღო.

ფირმა "სიმენსი და ჰალსკეს" წარმომადგენელი იყო ვენაში, პარიზსა და ვარშავაში; 1860 წლიდან ვალტერ სიმენსი თბილისში ჩამოვიდა და დაიწყო სატელეგრაფო სადგურების მოწყობა თბილისიდან სხვადასხვა მიმართულებით (გორი, სურამი, ქუთაისი, ფოთი); 1862 წელს გ. ორბელიანის ნებართვით (N327) ადგილობრივ ხელისუფლებასა და ვ. სიმენსს შორის დაიდო კონტრაქტი თბილისსა და ქ. სტავროპოლს შორის სატელეგრაფო სადგურების დამონტაჟების თაობაზე; 1863 წლის 12 იანვარს დუშეთზე, ვლადიკავკაზსა და პიატიგორსკზე გავლით თბილისსა და სტავროპოლს შორის სატელეგრაფო კავშირი დამყარდა; 1864 წელს მან  ქ. ჯულფაში დაამონტაჟა სატელეგრაფო აპარატები და 1865 წლიდან თბილისსა და თეირანს (ირანი) შორის დაიწყო საერთაშორისო დეპეშების გაცვლა; 1866 წელს ის თბილისში პრუსიის კონსულად დანიშნეს; თბილისისთვის მნიშვნელოვანი იყო ბაქოსთან სატელეგრაფო კავშირის დამყარება. ეს საქმე მან ითავა და 1868 წლის იანვარში დაიწყო თბილისიდან ბაქოში დეპეშების გადაცემა; მის საქმიანობას თბილისის საზოგადოება დიდად აფასებდა; საქართველოსა და კავკასიაში პირველი სატელეგრაფო კავშირების მომწყობი ვალტერ სიმენსი "კავკასიის ტელეგრაფის მამად" არის აღიარებული; თბილისში, ლ. ასათიანის (ყოფილი ფ. ენგელსის) ქუჩაზე N30-ში არსებობს მისი მემორიალური დაფა.

წყარო:თბილისი: ენციკლოპედია.- თბ., 2002. - გვ.829; სპუტნიკი-საქართველოს ვებგვერდი: sputnik-georgia.com; newcaucasus.com;  100 ღირსსახსოვარი სახელი = 100 памятных имен = 100 memorable names : საქართველოში და საქართველოს გარეთ მოღვაწე უცხოელები / სარედ. კოლ.: მარიამ ლორთქიფანიძე, როინ მეტრეველი, ზურაბ აბაშიძე [და სხვ.] .- თბ., 2014.-გვ. 242