ალექსანდრე სოკოლოვი

თბილისის საქალაქო არქიტექტორი 1858-1864წწ., შემდეგ გადავიდა სტავროპოლში. იმ ხანების თბილისის ხუროთმოძღვრებაში უკვე ეკლექტიზმი იყო შემოჭრილი, რომლის გავლენითაც აკეთებდა "გოტიკურ" და "ამპირულ" ფასადებს, მაგრამ მისივე არქიტექტურული მონაწილეობით შემუშავდა თბილისური იერის მქონე სახლის ახალი ტიპიც, რომელიც ფართოდ გავრცელდა. მიუხედავად იმისა, რომ ფასადები ეკლექტიკური ხასიათისა იყო, მათ მაინც შენარჩუნებული ჰქონდათ ადგილობრივი სპეციფიკის ელემენტები (კერძოდ ხის აივნები). აშენებდა ძირითადად საცხოვრებელ სახლებს, რომელთაგან დღეისათვის, თუმცა გადაკეთებული სახით, მაგრამ მაინც შემონახულია რამდენიმე: ა. ფურცელაძის N6 (1858), კოჯრის N5 (1860), გერცენის N8 (1860), რ. თაბუკაშვილის N35 (1861), მტკვრის N3 (1861), პ. ინგოროყვას N12 (1862) და სხვა. მან რამდენიმე ქარვასლაც ააშენა.

წყარო: თბილისი: ენციკლოპედია.- თბ., 2002. - გვ.835-836