თეოფილე ლომთათიძე

დაბადების ადგილი: სოფელი მეწიეთია, ჩოხატაურის რაიონი.

სწავლა–განათლება არ მიუღია, ბავშვობიდანვე იყო სიმღერით გატაცებული; კარგი სმენა და წვრილი ხმა განაპირობებდა კრიმანჭულის მისეულ სხარტ შესრულებას; სხვადასხვა ქალაქებსა და ნავსადგურებში ხანგრძლივად იმუშავა; შემდეგ ნოვოროსიისკში მუშათა არტელის მესვეურობა დაავალეს; 1919-1924წწ. ისევ სოფელში დაბრუნდა და მეურნეობას ეწეოდა; მომდევნო წლიდან თბილისში ჩამოვიდა და რკინიგზის სატვირთო სადგურში დაიწყო მუშაობა; კრიმანჭულს არასდროს ივიწყებდა; ამ ხნის განმავლობაში მღეროდა მუშათა სხვადასხვა წრეებში და ახალბედებს ასწავლიდა; მას კირილე პაჭკორიამ მიაგნო და ძუკუ ლოლუას სახელობის გუნდში მიიწვია სოლისტ-მომღერლად, სადაც კეთილსინდისიერად მუშაობდა; ამის შემდეგ დიდ ანსამბლში გადაიყვანეს; მონაწილეობდა ქართული ხელოვნების I საკავშირო დეკადაზე, მანამდეც და შემდგომშიც საქართველოსა და მოძმე რესპუბლიკებში მრავლად გამართულ კონცერტებში; 1935 წელს მოსკოვის სიახლოვეს, აგარაკ გორკაში, მათთვის გამართულ კონცერტზე რომენ როლანმა და მაქსიმ გორკიმ მოისმინეს თეოფილე ლომთათიძის მიერ შესრულებული ვირტუოზული კრიმანჭულის სამნაირი ვარიანტი და უზომო აღტაცება გამოთქვეს; ის იყო ჩუმი, თავმდაბალი, "ანსამბლის სინდისს" ეძახდნენ, სიტყვაძვირი ადამიანი ყველას აოცებდა თავისი მახვილგონიერებით; ახალ თაობას მონდომებით ასწავლიდა ხალხურ სიმღერას; თვითნასწავლი მომღერალი.

წყარო: http://chanting.ge/?page_id=7