გივი სურვილაძე

დაამთავრა თბილისის ოპერისა და ბალეტის სახელმწიფო თეატრთან არსებული ქორეოგრაფიული სტუდია (ხელმძღვანელი დ. ჯავრიშვილი) 1941 წელს.

1941 წელს ჩაირიცხა თეატრის საბალეტო დასში; ასრულებდა ხალხურ ცეკვებს ოპერებში ("დაისი", "ქეთო და კოტე", "პატარა კახი"), ქორეოგრაფიულ პარტიებს ბალეტებში ("მთების გული", "დონ კიხოტი" და სხვა); 1943-1944წწ. მუშაობდა ამიერკავკასიის სამხედრო ოლქის სიმღერისა და ცეკვის ანსამბლში (ქორეოგრაფი ი. არბატოვი). ანსამბლი კონცერტებს მართავდა II მსოფლიო ომის დროს (ხშირად ფრონტის წინა ხაზზე), აღსანიშნავია წარმოდგენა "თეირანის კონფერენციის" მონაწილეთათვის (ი. სტალინი, ფ. რუზველტი, უ. ჩერჩილი); 1946-1968წწ. საქართველოს ხალხური ცეკვის სახელმწიფო დამსახურებული ანსამბლის (ახლანდელი ი. სუხიშვილის სახელობის "ქართული ნაციონალური ბალეტი") წამყვანი მოცეკვავე იყო; მის შესრულებას ახასიათებდა მაღალი ოსტატობა, ცეკვის არსში წვდომა, ტემპერამენტი და მოხდენილობა; ღირსეულ პარტნიორობას უწევდა ანსამბლის ხელმძღვანელს ნ. რამიშვილს; ანსამბლში ქორეოგრაფ-რეპეტიტორის მოვალეობასაც ასრულებდა; ანსამბლთან ერთად გასტროლებით შემოიარა მსოფლიოს მრავალი ქვეყანა; 1973-1992წწ. იყო სასტუმრო "თბილისის" რესტორნის დირექტორი და ღამის კლუბ "მუხამბაზის" დირექტორი და სამხატვრო ხელმძღვანელი.

წყარო: თბილისი: ენციკლოპედია.- თბ., 2002. - გვ.846; facebook.com; წიგნი ღირსებისა: ტ. 6/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.96

• 2001 - ღირსების ორდენი
• 1967 - საქართველოს ხელოვნების დამსახურებული მოღვაწე
• 1958 - საპატიო ნიშნის ორდენი
• 1953 - საქართველოს დამსახურებული არტისტი
• 1953 - მსოფლიო ახალგაზრდობისა და სტუდენტთა IV საერთაშორისო ფესტივალი, ოქროს მედალი
• 1949 - რუმინეთის სახალხო რესპუბლიკის "დიდების ორდენი"
• 1945 - მედალი "გერმანიაზე გამარჯვებისთვის"