ნუგზარ ზოიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის მეტალურგიის ფაკულტეტი 1958 წელს.

1958 წლიდან მუშაობდა საქართველოს მეცნიერებათა აკადემიის მეტალურგიის სამეცნიერო-კვლევით ინსტიტუტში სხვადასხვა თანამდებობაზე. 1984–1998 წლებში იყო ამავე ინსტიტუტის ლაბორატორიის გამგე და დირექტორის მოადგილე სამეცნიერო დარგში. მონაწილეობდა ხუთენოვანი (ქართ.-რუს.-ინგლ.-გერმ.-ფრანგ.) მეტალურგიული ტერმინოლოგიური ლექსიკონის გამოცემაში (მოსკოვი, 1988). ინგლისურიდან რუსულად თარგმნა "რკინის მეტალოგრაფია" (სამტომეულის II ტომი, მოსკოვი, 1972). 1982 წლიდან პედაგოგიურ საქმიანობას ეწეოდა საქართველოს ტექნიკური უნივერსიტეტის მეტალურგიის ფაკულტეტზე. მისი კვლევის მიმართულებებია: ფაზური გარდაქმნების თერმოდინამიკა და კინეტიკა; ლითონური შენადნობების თერმული და თერმომექანიკური დამუშავება; მაღალი მექანიკური თვისებების მქონე ფოლადების მიღება; ფხვნილთა მეტალურგია და კომპოზიტური მასალები. მიღებული აქვს მრავალი საავტორო მოწმობა და პატენტი. ინჟინერ-მეტალურგი, ტექნიკურ მეცნიერებათა დოქტორი (1994), პროფესორი (1996).

წყარო: საქართველო: ენციკლოპედია: ტ.III.–თბ., 2014.-გვ.375; საქართველოს მეცნიერებათა დოქტორები, 1992-2006/შემდგ. და რედ.: ირინა ჯაფარიძე. -თბ., 2012. -გვ.191