სოლომონ მაღალაძე

მოღვაწეობდა XVII-XVIII სს. მიჯნაზე; წარმოშობით იყო სოფელ წინარეხიდან (კასპის რაიონი) მცხოვრებ აზნაურთა გვარიდან. 1702 წელს კათალიკოსის მდივან-მწიგნობარ-მგალობელი იყო; წერდა საბუთებს, იყო ცნობილი კალიგრაფი. ლამაზი მხედრულით გადაუწერია ბესარიონ ორბელიანის "გრდემლი" (ხელნაწერთა ინსტიტუტი, S- 286), აგრეთვე ვახტანგის სამართლის წიგნების ერთ-ერთი უძველესი ნუსხა (ხელნაწერთა ინსტიტუტი, S - 3683) და სხვა. მონაწილეობდა ვახტანგ VI-ის სტამბის საქმიანობაში (მისი დამზადებული უნდა იყოს ხელნაწერი ნიმუში სასტამბო მხედრული შრიფტისთვის). სოლომონს აუშენებია 1716 წელს მაღალაანთ ეკლესიის სამრეკლო. სოლომონ მაღალაძე, ბერი ნიკოლოზ მაღალაძის ბიძაშვილი, მწიგნობარ-კალიგრაფი. 

წყარო: ქართული საბჭოთა ენციკლოპედია: ტ. 6.-თბ., 1983.-გვ.501