პეტრე ქავთარაძე

დაბადების ადგილი: სოფელი ზოვრეთი, ზესტაფონის რაიონი.

დაამთავრა პეტროგრადის უნივერსიტეტის იურიდიული ფაკულტეტი 1915 წელს.

საქართველოში დაბრუნებისთანავე ნაფიც დამცველთა კოლეგიაში ჩაეწერა. დამოუკიდებლობის წლებში (1918-1921) პავლე საყვარელიძესთან ერთად ხელმძღვანელობდა საქართველოს სოციალ-დემოკრატიული პარტიის "ალიონის" ჯგუფს (მისი ბეჭდვითი ორგანო იყო გაზეთი "ალიონი"), რომელიც ოპოზიციაში ედგა ნოე ჟორდანიას მთავრობას. საქართველოს "გასაბჭოების" შემდეგ კვლავ ადვოკატად მუშაობდა, გამოდიოდა დამცველად დიდ სასამართლო პროცესებზე. 1927–1928წწ. იყო ლიტერატურული გაერთიანება "არიფიონის" წევრი. 1937 წელს მონაწილეობა მიიღო რუსულ-ქართული ლექსიკონის შედგენაში, რედაქცია გაუკეთა მთელ ლექსიკურ მასალას და ითავა ფრაზეოლოგიისა და მაგალითების დამატება. იყო იურიდიული ტერმინოლოგიის ერთ-ერთი შემდგენელი (გამოვიდა 1963 წ.). ორიგინალიდან თარგმნა სოფოკლეს "ოიდიპოს მეფე", "ანტიგონე", პლატონის "სოკრატეს აპოლოგია", "კრიტონი", ციცერონის "პირველი სიტყვა კატილინას წინააღმდეგ", ოვიდიუსის "ჰეროიდები" და სხვა. ლექსიკოგრაფი.

წყარო: ქართული საბჭოთა ენციკლოპედია: ტ.10-თბ., 1986.-გვ.442

• ლიტერატურული გაერთიანება "არიფიონი", წევრი (1927-1928)