ოლღა თედეევი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ფილოლოლოგიის ფაკულტეტის კავკასიური ენების განყოფილება 1943 წელს.

1950–1951 წლებში იყო ცხინვალის პედაგოგიური ინსტიტუტის პედაგოგი, კითხულობდა ლექციებს ქართულ დიალექტოლოგიაში. 1961 წლიდან გარდაცვალებამდე მუშაობდა მეცნიერებთა აკადემიის აღმოსავლეთმცოდნეობის ინსტიტუტის ინდურ-ირანული ენების განყოფილებაში – იყო წამყვანი მეცნიერი-თანამშრომელი. ინსტიტუტში მუშაობის დროს მან არაერთი ოსოლოგი აღზარდა. ოლღა თედეევი იკვლევდა ქართულ-ოსური კულტურულ-ენობრივი ურთიერთობის საკითხებს; გამოავლინა ქართული ნასესხობანი ოსურში და, პირიქით, ოსური ნასესხობანი ქართულში. მნიშვნელოვანი გამოკვლევები, მიძღვნილი ქართულ-ოსური ენობრივი საკითხებისადმი, განზოგადდა მის მონოგრაფიაში "ნარკვევები ქართულ-ოსური ენობრივი ურთიერთობიდან"(1983). მან თარგმნა ოსური ფოლკლორის ცნობილი ძეგლი "ნართების ეპოსი" ("არმაღანი" II, 1977; III, 1982); ყურადღება მიაქცია ეპოსის ე. წ. ამოუხსნელ სიტყვებს და ბევრი მათგანის წარმომავლობა და მნიშვნელობა დაადგინა; შეისწავლა ოსი პოეტის ივანე იალღუზიძისა და დანიელ ჭონქაძის შემოქმედება (ამ უკანასკნელის როგორც ოსოლოგისა). ფილოლოგიის მეცნიერებათა დოქტორი (1975), აღმოსავლეთმცოდნე, კავკასიოლოგი.

წყარო: საქართველო: ენციკლოპედია: ტ.III.–თბ., 2014.-გვ.641

• ნარკვევები ოსურ-ქართული ენობრივი ურთიერთობიდან (ავტორი). - თბილისი, მეცნიერება, 1988. - 76გვ.
• პირველი ოსური ხელნაწერების ენა (ავტორი). - თბილისი, მეცნიერება, 1985. - 93გვ.
• ნარკვევები ქართულ-ოსური ენობრივი ურთიერთობიდან (ავტორი). - თბილისი, მეცნიერება, 1983. - 230გვ.
• დანიელ ჭონქაძე როგორც ოსოლოგი (ავტორი). - თბილისი, მეცნიერება, 1979. - 42გვ.