ვასილ თეთრუაშვილი

დაბადების ადგილი: თბილისის გუბერნია.

დაამთავრა თბილისის კადეტთა კორპუსი (1891), პავლე I სახელობის სასწავლებელი I თანრიგით (1893), ნიკოლოზის გენერალური შტაბის აკადემია II თანრიგით (1901).

მსახურობდა 155-ე ყუბანის ქვეით პოლკში, მე-16 გრენადერთა პოლკში; 1907–1909 წლებში მიავლინეს ერევნის დროებითი გენერალ-გუბერნატორის განკარგულებაში, სადაც ასრულებდა სამოქალაქო კანცელარიის მმართველისა და ერევნის გუბერნიის დაცვის ჯარების შტაბის უფროსის მოვალეობას; პირველი მსოფლიო (1914–1918) ომის დაწყებისთანავე 1914–1915 წლებში დროებით ასრულებდა დაღესტნის 82-ე ქვეითი პოლკის უფროსის მოვალეობას, მონაწილეობდა ავსტრიელთა და გერმანელთა წინააღმდეგ ბრძოლებში; 1915 წელს დაინიშნა ლორეს 208-ე ქვეითი პოლკის მეთაურად. დაიღუპა ბრძოლის ველზე. დაკრძალულია ხოლმის გუბერნიის სოფ. ტომაშევოში (უკრაინა), სამხედრო სასაფლაოზე. დაჯილდოებულია ოქროს იარაღით, რუსეთის იმპერიის არმიის გენერალ-მაიორი (1915).

წყარო: საქართველო: ენციკლოპედია: ტ. IV. -თბ., 2018. -გვ.16

• 1916 - წმინდა სტანისლავის II ხარისხის ორდენი (ხმლებით)
• 1916 - წმინდა გიორგის IV ხარისხის ორდენი
• 1916 - წმინდა ანას II ხარისხის ორდენი (ხმლებით)
• 1916 - წმინდა ვლადიმირის III ხარისხის ორდენი (ხმლებით)
• 1911 - წმინდა ანას III ხარისხის ორდენი
• 1906 - წმინდა სტანისლავის III ხარისხის ორდენი