დოსითეოს ჩერქეზიშვილი

XVIII საუკუნის II ნახევრის ქართველი მწერალი. ანტონ I კათალიკოსის ლიტერატურული სკოლის წარმომადგენელი. დაახლოებით 1758-1789 წლებში ნეკრესის ეპისკოპოსი ყოფილა და იწოდებოდა ნეკრესელად. ერთხანს ერეკლე II-ის მიერ გახსნილ თელავის საღვთისმეტყველო სკოლაში სწავლობდა, აქვე დაუწყია ლიტერატურული მოღვაწეობაც. წვლილი მიუძღვის ქართულ-სომხური ლიტერატურის ურთიერთობათა განმტკიცებაში. ფილიპე ყაითმაზაშვილთან ერთად სომხურიდან თარგმნიდა ფილოსოფიური ხასიათის თხზულებებს. ქართველი ფილოლოგის, ისტორიკოსის და საზოგადო მოღვაწის, პროფესორ ალექსანდრე ხახანაშვილის ცნობით, მას სომხურიდან გადმოუღია აპოკრიფებიც, მათ შორის "სიყრმე უფლისა". ცნობილი იყო როგორც ნიჭიერი და მჭერმეტყველი მქადაგებელი.

წყარო: ქართული საბჭოთა ენციკლოპედია: ტ. 11.-თბ., 1987.-გვ.103