ალექსანდრე თუშმალიშვილი

დაამთავრა თბილისის მე-2 ვაჟთა გიმნაზია 1894 წელს.

მუშაობა დაიწყო სოფელ მუკუზნის საუფლისწულო მამულში. 1897 წელს საუფლისწულო უწყებამ მიავლინა აბრაუ-დიურსოს(ახლანდ. ანაპის რაიონი, კრასნოდარის მხარე) მამულში. დაბრუნდა 1900 წელს და მუშაობა განაგრძო წინანდლის საუფლისწულო მამულში. 1911 წელს დაინიშნა მუკუზნის საუფლისწულო მამულის მმართველად. ალექსანდრე თუშმალიშვილმა სხვადასხვა დროს კახეთში მნიშვნელოვანი სამუშაოები ჩაატარა: საფუძველი ჩაუყარა ამერიკული ვაზის სადედეს; სოფელ ჩუმლაყში ააშენა სათბური; მუშა-მოსამსახურეთა შვილებისათვის გახსნა დაწყებითი სასწავლებელი; დააარსა ბიბლიოთეკა; ააშენა ქსენონი; სოფელ ვაზისუბანში მოაწყო საცდელ-საჩვენებელი ვენახი. 1914 წელს იგი დაინიშნა სტავროპოლის გუბერნიის, ტემპელჰოფის საუფლისწულო მამულის მმართველად, ხოლო 3 წლის შემდეგ–ისევ მუკუზნის საუფლისწულო მამულის მმართველად. საბჭოთა ხელისუფლების წლებში სოფელ კონდოლისა და იყალთოს მეურნეობებში მოაწყო სათბურ-სანერგეები, გააშენა ახალი ვენახი. ალექსანდრე თუშმალიშვილის თაოსნობით წინანდალში აიგო ელექტროსადგური, გაშენდა კონიაკის ქარხანა. 1932 წელს დაინიშნა მუკუზნის მეურნეობის უფროს სპეციალისტად. არის საბჭოთა რეპრესიების მსხვერპლი. აგრონომი.

წყარო: საქართველო: ენციკლოპედია: ტ. IV. -თბ., 2018. -გვ.140-141