რაფიელ ივანიცკი-ინგილო

დაბადების ადგილი: სოფელი კახი (საინგილო), ახ. აზერბაიჯანი.

თელავის სასულიერო სასწავლებლისა და პეტერბურგის უნივერსიტეტის იურიდიული ფაკულტეტის დამთავრების შემდეგ მუშაობდა იურისტად. მან აქტიური მონაწილეობა მიიღო საქართველოს ეკლესიის ავტოკეფალიის აღდგენა- გამოცხადების საქმეში. 1921 წლიდან,საქართველოში საბჭოთა ხელისუფლების დამყარების შემდეგ, ცხოვრობდა გერმანიასა და ავსტრიაში, 1924–1948 წლებში – რომში (იტალია). იტალიურ ენაზე აქვეყნებდა ნარკვევებსა და სტატიებს, რომლებითაც იტალიურ საზოგადოებას უღვივებდა ინტერესს ქართული კულტურისა და ისტორიისადმი, თარგმნიდა ქართული ლიტერატურის ნიმუშებს. 1942 წელს იტალიურ ენაზე პირველად გამოსცა "ვეფხისტყაოსნის" არასრული თარგმანი. 1948 წელს პარიზში მღვდლად ეკურთხა. იყო ესპანეთის მართლმადიდებელი ეკლესიის რექტორი მადრიდში. საზოგადო მოღვაწე. (გარდაიცვალა მადრიდში).

 წყარო: საქართველო: ენციკლოპედია: ტ. IV. -თბ., 2018. -გვ.211

• რომის პაპის კარზე საქართველოს ეკლესიის წარმომადგენელი
• საქართველოს დამფუძნებელი კრება, საინგილოს დეპუტატი
• საქართველოს ეროვნულ–დემოკრატიულ პარტია, მთავარი კომიტეტის წევრი, მდივანი (1917-)
• საქართველოს საკათალიკოსო საბჭო, წევრი, მდივანი