შალვა ყიფიანი

დაბადების ადგილი: სოფელი ობჩა, მაიაკოვსკის რაიონი (ბაღდათის რაიონი).

დაამთავრა თბილისის სახელმწიფო უნივერსიტეტთან არსებული პედაგოგიური ინსტიტუტის საბუნებისმეტყველო ფაკულტეტი 1933 წელს. 1934-1937წწ. გაიარა ასპირანტურის კურსი თბილისის სახელმწიფო უნივერსიტეტში პროფესორ ალექსანდრე ჯავახიშვილის ხელმძღვანელობით.

1934-1941წწ. ეწეოდა პედაგოგიურ და სამეცნიერო-კვლევით მუშაობას თბილისის სახელმწიფო უნივერსიტეტში; 1942-1945წწ. მონაწილეობდა მეორე მსოფლიო ომში; 1946 წლიდან მუშაობდა თბილისის სახელმწიფო უნივერსიტეტში. კითხულობდა ლექციებს საქართველოსა და კავკასიის გეომორფოლოგიაში, სსრკ გეომორფოლოგიაში, რელიეფის ფორმათა სისტემატიკაში, კარსტოლოგიასა და გეომორფოლოგიის კვლევის მეთოდებზე; 1946 წლიდან მუშაობდა აგრეთვე ვახუშტი ბაგრატიონის სახელობის გეოგრაფიის ინსტიტუტში, 1946 წელს სწავლული მდივნის, 1947-1951წწ. დირექტორის მოადგილის სამეცნიერო დარგში, 1958-1975წწ. კარსტოლოგია-სპელეოლოგიის ლაბორატორიის ხელმძღვანელის (საზოგადოებრივ საწყისებზე) თანამდებობებზე; 1938-1941წწ. ასრულებდა საქართველოს გეოგრაფიული საზოგადოების სწავლული მდივნის, ხოლო 1946-1950წწ. თავმჯდომარის მოადგილის თანამდებობას სამეცნიერო დარგში. სამეცნიერო-კვლევითი მუშაობის ძირითად პროფილს საქართველოს კარსტული რელიეფის შესწავლა, აგრეთვე კარსტოლოგიის თეორიული საკითხების კვლევა შეადგენდა. გამოქვეყნებული აქვს 160 სამეცნიერო ნაშრომი. ისინი ეხება გეომორფოლოგიურ, კარსტოლოგია-სპელეოლოგიურ, გეოგრაიფულ მეცნიერებისა და განათლების ისტორიის საკითხებს. აღსანიშნავია მისი წვლილი საქართველოს გეოგრაფიის სასკოლო სახელმძღვანელოს შექმნა-გაუმჯობესებაში; 1960-1977წწ. ხელმძღვანელობდა ვახუშტი ბაგრატიონის სახელობის გეოგრაფიის ისნტიტუტის ახალგაზრდა მეცნიერ-მუშაკთა სამეცნიერო სემინარს. საქართველოს კარსტის ცნობილი მკვლევარი. არაერთი სპელეოლოგიური ექსპედიციის მონაწილე, რომლის შედეგად საქართველოს მრავალი კარსტული გამოქვაბული იქნა გამოკვლეული. აღსანიშნავია ექსპედიციები არაბიკა-ახაგის ქედზე, ასხის მასივზე, ბზიფის ქედზე, ახალი ათონის მიდამოებში, კელასურ-კოდორის მდინარეთაშუეთში, სათაფლიაზე, შაორის ტერიტორიაზე და სხვა. ავტორია არაერთი სამეცნიერო ნაშრომისა: "საქართველოს კარსტი", "არაბიკა-ახაგის ქედის კარსტული ლანდშაფტის გეომორფოლოგიისათვის", "ასხის კარსტული პლატოსებრივი მაღლობის გეომორფოლოგიისათვის" და ა.შ. მიღებული აქვს სახელმწიფო ჯილდოები. გეოგრაფიულ მეცნიერებათა კანდიდატი, დოცენტი (1941).

საკანდიდატო დისერტაციის თემა - "შაორის ამოქვაბულის გეომორფოლოგიური დახასიათებისათვის". დაიცვა 1941 წელს.

წყარო: ქართული საბჭოთა ენციკლოპედია: ტ.10-თბ., 1986.-გვ.656; საქართველოს მეცნიერებისა და ტექნიკის დარგის სახელმწიფო პრემიის ლაურეატები 1993-2004 წწ. . -თბ., 2012.-გვ.73; ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.267-268

• სკკპ, წევრი (1946-)
• სსრკ გეოგრაფიული საზოგადოება, საპატიო წევრი (1985-)

• 1977 - საქართველოს სახელმწიფო პრემია (ერთობლივი გამარჯვება)
  ახალი ათონის მღვიმის კომპლექსის შესწავლა-კეთილმოწყობისათვის
• საქართველოს სახელმწიფო პრემია, მეცნიერებისა და ტექნიკის დარგში (ერთობლივი გამარჯვება, გარდაცვალების შემდეგ)
  დამხმარე სახელმძღვანელო - "საქართველოს სასწავლო-გეოგრაფიული ატლასი" (გამოცემულია თბილისში 1992 წელს)

• საქართველოს კარსტი : გეომორფოლოგიური დახასიათების ცდა (ავტორი) // წ. 1 : გავრცელება, შესწავლილობა და მორიგი ამოცანები. - თბილისი, მეცნიერება, 1974. - 349გვ.
• ალექსანდრე ჯავახიშვილი : საქართველოში გეოგრაფიული მეცნიერების ფუძემდებელი (ავტორი). - თბილისი, ნაკადული, 1971. - 74გვ.
• ნარკვევები გეოგრაფიული მეცნიერებისა და განათლების შესახებ საქართველოში (ავტორი) // ნაკვ. 1 : ალ. ჯავახიშვილი. ცხოვრება და სამეცნიერო-პედაგოგიური მოღვაწეობა. - თბილისი, საქ. მეც. აკად. გამ. და სტ., 1957. - 172გვ.