ივანე წიქრიძე

XVI–XVII საუკუნეების მიჯნის ოქრომჭედელი. მისი შესრულებულია ღვთისმშობლის ოქროს ხატი ჩადგმული 12 მოციქულის დიდ ხატში, რომელიც შემოქმედის მონასტერში ინახებოდა. ხატი მამია გურიელისა და მისი მეუღლის თინათინის მიერ იყო შეწირული. სხვებთან ერთად გვხვდება ასეთი წარწერაც: "ქორონიკონსა ორასოთხმოცდაცხრასა(1601) ივანეს ოქრომჭედელს შეუნდოს ღმერთმან წიქრიძეს". ექვთიმე თაყაიშვილს მიაჩნია რომ ივანეს(ოვანეს) შესრულებულია სოფელ გურიანთის ე. წ. ციხის ეკლესიის ღვთისმშობლის ხატიც შეწირული იმავე მამიასა და თინათინის მიერ.

წყარო: საქართველო: ენციკლოპედია: ტ. IV. -თბ., 2018. -გვ.211