ლავრენტი ციცაგი

დაბადების ადგილი: ქ. თბილისი.

დაამთავრა თბილისის ქართული სათავადაზნაურო გიმნაზია 1917 წელს; აკ. ფაღავას სტუდია 1924 წელს.

1920 წელს თბილისის ცენტრალურ კლუბთან არსებულ დრამწრის წარმოდგენაში პირველად გამოვიდა სცენაზე. შეასრულა სოსანას როლი ავქ. ცაგარელის კომედიაში "რაც გინახავს, ვეღარ ნახავ", დრამწრეში მუშაობდა 1922 წლამდე; ამავე წლებში ირიცხებოდა თანამშრომლად რუსთაველის სახელობის სახელმწიფო თეატრში; მოღვაწეობდა მსახიობად და რეჟისორად: 1924-1925წწ. ჭიათურის, 1925-1926წწ. ბათუმის, 1926-1927წწ. ბაქოს ქართულ, 1927-1928წწ. თბილისის მუშათა, 1929-1930წწ. სამტრედიის, 1931-1932წწ. ფოთის თეატრებში, აგრეთვე 1932-1934წწ. თბილისის ვოროშილოვისა და სტალინის სახელობის მუშათა კლუბებში; იყო სამხატვრო ხელმძღვანელი 1936-1937წწ. ხაშურის, 1938-1940წწ. სამტრედიის, 1941-1942წწ. მახარაძის თეატრებისა; 1941-1942წწ. მუშაობდა რეჟისორად რუსთაველის სახელობის თეატრში; 1943-1952წწ. მსახურობდა საქართველოს სსრ ხალხური შემოქმედების სახლში თეატრალური განყოფილების გამგედ; 1953 წლიდან ეწეოდა პედაგოგიურ მოღვაწეობას, თბილისის მუსიკალურ სასწავლებელში ასწავლიდა სასცენო ხელოვნებას. შესრულებული აქვს 30-ზე მეტი როლი. მათ შორის აღსანიშნავია: მეფე (ი. გედევანიშვილის "სინათლე"), ბერსენევი (ბ. ლავრენიოვის "რღვევა"), დუდუკინი (ა. ოსტროვსკის "უდანაშაულო დამნაშავენი"), რევაზ ბებურიშვილი (ა. წერეთლის "პატარა კახი") და სხვ.; დადგმული აქვს 40-მდე პიესა, მათ შორის: შ. დადიანის "გუშინდელნი", "მზის ამოსვლამდე", პ. კაკაბაძის "ყვარყვარე თუთაბერი", "კოლმეურნის ქოწილი", აქვ. ცაგარელის "რაც გინახავს, ვეღარ ნახავ", "ხანუმა" და სხვ., თარგმნა პიესები: ა. ოსტროვსკის "კატა ვერ შესწვდა ძეხვსაო", ფედოროვის "გზები" და სხვ.

წყარო: საიუბილეო თარიღები: თეატრი, მუსიკა, კინო.- თბ., 1988. -გვ.18; საიუბილეო თარიღები : თეატრი, მუსიკა, კინო .- თბ.,2008.- გვ. 22

• 1951 - საქართველოს ხელოვნების დამსახურებული მოღვაწე